დღეს, თბილისის დროით 19:30 საათზე, საქართველოს ეროვნული ნაკრები საკუთარ კედლებში მონტენეგროს უმასპინძლებს. ალექსანდარ ჯიკიჩის გუნდისთვის მსოფლიო ჩემპიონატის საკვალიფიკაციო ეტაპის მეორე რაუნდის პირველი მატჩი განსაკუთრებული მნიშვნელობის მატარებელია — წინ ისეთი შეხვედრაა, რომელშიც გამარჯვება ძალიან მნიშვნელოვანია.
შეგახსენებთ, რომ ეს გახლავთ 2027 წელს კატარში გასამართი მსოფლიო ჩემპიონატის საკვალიფიკაციო ტურნირის მეორე ჯგუფური ეტაპი. ამ ჯგუფში თავმოყრილმა ექვსმა გუნდმა პირველი ეტაპი წარმატებით გადალახა და მსოფლიოს პირველობაზე მოხვედრისთვის ბრძოლას აგრძელებს. საქართველომ თავისი ჯგუფიდან ესპანეთთან და უკრაინასთან ერთად მოიპოვა მეორე ეტაპის საგზური, ხოლო პარალელური ჯგუფიდან მონტენეგრო (პირველი ადგილი), პორტუგალია (მეორე ადგილი) და საბერძნეთი (მესამე ადგილი) გადმოვიდნენ. ეს ექვსი გუნდი დღეს მეორე ეტაპს დაიწყებს, საიდანაც საუკეთესო სამეული, ექვსი ტურის შემდეგ მსოფლიოს ჩემპიონატის საგზურს მოიპოვებს.
ჩვენი ნაკრები მოახლოებულ დაპირისპირებას კარგ ფორმაში ხვდება. საქართველომ ბოლო ამხანაგურ მატჩში ისრაელი დამაჯერებლად, 101:90 დაამარცხა და გუნდმა საკვალიფიკაციო ეტაპის განახლების წინ საკუთარი შესაძლებლობები კიდევ ერთხელ გამოავლინა. მონტენეგრომაც ბოლო სპარინგში კარგი შედეგი აჩვენა და სლოვენიას 85:78 მოუგო. ორივე გუნდი ოპტიმალურ ფორმასთან ახლოსაა და მნიშვნელოვანი დანაკლისიც თითქმის არ აქვს.
ჯგუფში მდგომარეობა კი საქართველოსთვის დამატებით წნეხს ქმნის. მონტენეგროს აქტივში 10 ქულაა და გუნდი მესამე პოზიციაზე იმყოფება, საქართველო კი 9 ქულით მეექვსე, ბოლო ადგილზეა. შესაბამისად, ხვალინდელ მატჩს მხოლოდ მორიგი შეხვედრის სტატუსი ნამდვილად არ აქვს. საკუთარ კედლებში მონტენეგროს დამარცხება ჩვენი ნაკრებისთვის უმნიშვნელოვანესი ნაბიჯი იქნება მსოფლიო ჩემპიონატისკენ მიმავალ გზაზე.
საქართველოს ნაკრების განაცხადი:
მონტენეგრო ძლიერი და გამოცდილი მეტოქეა, თუმცა საკუთარ კედლებში თამაშის ფაქტორი აუცილებლად უნდა გამოვიყენოთ. გულშემატკივრის მხარდაჭერით, კარგ ფორმაში მყოფ საქართველოს ნაკრებს ხვალ გამარჯვებისთვის ბრძოლა შეუძლია.
