სუზუკას საერთაშორისო ავტოდრომზე გამარჯვება მაქს ვერსტაპენმა მოიპოვა, ხოლო პოდიუმი მაკლარენის მრბოლელებმა, ლანდო ნორისმა და ოსკარ პიასტრიმ შეავსეს.
მაქს ვერსტაპენის მასტერკლასი იაპონიაში
მოქმედმა ჩემპიონმა იაპონიის გრან პრი უშეცდომოდ ჩაატარა და კიდევ ერთხელ დაამტკიცა, რომ ავტოსპორტის ისტორიაში ერთ-ერთი გამორჩეულია. 27 წლის ნიდერლანდელმა კვალიფიკაციაზე საოცარი წრე გაიარა, მაკლარენები უკან ჩამოიტოვა და ყველასთვის მოულოდნელად პოულ პოზიცია მოიპოვა.
კვირის რბოლაზე, ვერსტაპენმა მოპოვებული პოულ პოზიცია სტარტზე წარმატებით შეინარჩუნა და უახლოესი მდევრები შეტევის მანძილზე არ მიუშვა. ნიდერლანდელი პილოტმა მთელი რბოლა უშეცდომოდ ჩაატარა, რედ ბულმა პიტ სტოპიც კარგად დაუგეგმა და 2025 წლის სეზონში პირველი გამარჯვება ჩაიწერა აქტივში.
მაკლარენის ინერტული რბოლა და ორმაგი პოდიუმი
2025 წლის სეზონის სტარტზე ყველაზე სწრაფი ბოლიდი მაკლარენს ჰყავს — ბრიტანული გუნდი უშუალო კონკურენტებს საგრძნობლად უსწრებს. სუზუკას საერთაშორისო ავტოდრომის სპეციფიკიდან გამომდინარე მაკლარენი აშკარა ფავორიტი იყო, თუმცა, ჯერ კვალიფიკაციაზე და შემდეგ უკვე რბოლაში, ფავორიტის სტატუსი ვერ გაამართლეს და ვერსტაპენს დაუთმო გამარჯვება.
ცალკე აღნიშვნის ღირსია ბრიტანული გუნდის უცნაური ტაქტიკა და გადაწყვეტილებები უშუალოდ რბოლის დროს. იყო მომენტი, როდესაც პიასტრი ნორისზე სწრაფი იყო და გატარებაც კი მოითხოვა, თუმცა, გუნდმა სტრატეგია არ შეცვალა. მთელი რბოლის განმავლობაში, მაკლარენი ინერტულად გამოიყურებოდა და ლანდო ნორისს ფაქტობრივად შეტევაც კი არ განუხორციელებია მაქს ვერტაპენზე. საბოლოოდ, გუნდმა ორმაგი პოდიუმი მოიპოვა, თუმცა, როდესაც გრიდზე ყველაზე სწრაფი ბოლიდი გყავს რამდენად მისაღებია მე-2 და მე-3 ადგილები ცალკე საკითხია.
რა ხდება სატურნირო ცხრილში?
ფორმულა 1-ის 2025 წლის სეზონის სამი რბოლის შემდეგ სატურნირო ცხრილში გარკვეული კონტურები გამოიკვეთა. პირველ რიგში ნათლად გამოჩნდა, რომ სეზონის სტარტზე მაკლარენს სარბოლო ტემპში უპირატესობა აქვს და არც თუ ისე მცირე. 3 გრან პრის შემდეგ, ბრიტანულ გუნდს 111 ქულა აქვს, პირველ ადგილზე იმყოფება და უშუალო კონკურენტს, მერსედესს 36 ქულით უსწრებს.
კონსტრუქტორთა დავაში მესამე პოზიციას რედ ბული იკავებს — ავსტრიულ გუნდს 61 ქულა აქვს და ყველა მოქმედმა ჩემპიონმა მოიპოვა. მე-4 ადგილზე კი 35 ქულით ფერარი იმყოფება, რომელმაც ჩინეთში მიღებული ორმაგი დისკვალიფიკაციის გამო საკმაოდ ბევრი ქულა დაკარგა. აღსანიშნავია, რომ კონსტრუქტორებში ალპინია ერთადერთი გუნდი, რომელსაც ჯერ ქულა არ მოუპოვებია.
დაძაბული მდგომარეობაა პირად ჩათვლაში, სადაც მცირე უპირატესობას ლანდო ნორისი ფლობს — 25 წლის ბრიტანელი მრბოლელის ანგარიშზე 62 ქულაა და მხოლოდ 1 ქულით უსწრებს მოქმედ ჩემპიონს, მაქს ვერტაპენს. მესამე ადგილზე კი 45 ქულით ნორისის თანაგუნდელი, ოსკარ პიასტრი იმყოფება.
ფორმულა 1-ის წლევანდელი სეზონის მომდევნო, რიგით მე-4 გრან პრი 13 აპრილს, ბაჰრეინის საერთაშორისო ავტოდრომზე გაიმართება, სადაც 2024 წელს გამარჯვებული მაქს ვერსტაპენი გახდა. აღსანიშნავია, რომ ბაჰრეინში ყველაზე მეტი, 7-7 გამარჯვება ფერარის და მერსედესის მრბოლელებს აქვთ მოპოვებული.
