ამინდის ცვლილებების გამო, კვირა დღეს გამართული რბოლა ქაოტური გამოდგა და უსაფრთხოების მანქანის გამოსვლა რამდენჯერმე გახდა საჭირო, რამაც თავდაყირა დააყენა გუნდების მიერ შემუშავებული სტრატეგიები.
დებიუტანტების კოშმარული სტარტი
2025 წლის სეზონში 6 ახალი პილოტი გამოჩნდა და მათგან სამმა კი საერთოდ პირველად იასპარეზა ფორმულა 1-ში. დებიუტი განსაკუთრებით მძიმე გამოდგა ისაკ ჰაჯარისთვის, რომელმაც გამახურებელ წრეზე ბოლიდი ვერ დაიმორჩილა და ბარიერს დაეჯახა, რამაც სტარტის პროცედურა 15 წუთით გადადო. განახლებული სტარტიდან პირველივე წრეზე რბოლას გამოეთიშა კიდევ ერთი ახალწვეული, ჯეკ დუანი, რომელსაც ბოლიდი მოუცურდა და უსაფრთხოების მანქანა გამოვიდა ტრასაზე.
პირველი გრან პრი წარუმატებელი გამოდგა გაბრიელ ბორტოლეტოსთვის და ლიამ ლაუსონისთვისაც, რომლებიც რბოლას 46-ე წრეზე გამოეთიშნენ. ახალწვეულებიდან კი ფინიშის ხაზი მხოლოდ ილივერ ბირმანმა და კიმი ანტონელიმ გადაკვეთეს. ბირმანი ბოლო, მე-14 ადგილზე გავიდა, ხოლო ანტონელის შესანიშნავი დებიუტი გამოუვიდა, მე-4 პოზიციაზე დაასრულა რბოლა და მერსედესს 12 ქულა მოუტანა. აღსანიშნავია, რომ წვიმიანი რბოლა შეცდომების გამო გამოცდილმა მრბოლელებმა, ფერნანდო ალონსომ და კარლოს საინსმაც ვერ დაასრულეს.
მაკლარენის დომინაცია იწყება?
ახალი სეზონის პირველი რბოლა ლანდო ნორისმა მოიგო, რომელიც კვალიფიკაციაზეც უსწრაფესი იყო და კვირა დღესაც არავის დაუთმო პირველობა. 44-ე წრემდე მაკლარენის პილოტები დამაჯერებლად ლიდერობდნენ, თუმცა, მოსახვევში ბოლიდი ვერ დაიმორჩილეს და ტრასის ფარგლები დატოვეს, რის გამოც პოზიციები დაკარგეს. ნორისმა მალევე, 3 წრეში დაიბრუნა ლიდერობა, პიასტრის კი რბოლა გაუფუჭდა და საბოლოოდ, მხოლოდ მე-9 ადგილს დასჯერდა.
ავსტრალიის გრან პრიზე გამოჩნდა, რომ მაკლარენი გრიდზე ყველაზე სწრაფია — ბრიტანულმა გუნდმა კვალიფიკაციაში უშუალო კონკურენტი, რედ ბული თითქმის 4 მეათედი წამით ჩამოიტოვა, რაც თანამედროვე ფორმულა 1-ში დიდი სხვაობაა. რბოლაშიც გამოჩნდა, რომ მაკლარენს საკმაოდ დიდი უპირატესობა აქვს, 30-ე წრეზე პილოტები კონკურენტებს 16 წამით უსწრებდნენ და უსაფრთხოების მანქანის გამოსვლამდე, ვერავინ ახერხებდა მათთან მიახლოებას.
მაღალი დონის რბოლა ჩაატარა მოქმედმა მსოფლიო ჩემპიონმა რედ ბულიდან, მაქს ვერსტაპენმა, რომელმაც ცვალებადი ამინდი და უსაფრთხოების მანქანები იდეალურად გამოიყენა და ნორისის წინააღმდეგ ბოლო მოსახვევამდე იბრძოლა. საბოლოოდ, 4 გზის ჩემპიონი მეორე ადგილს და 18 ქულას დასჯერდა.
ფერარის მორიგი იმედგაცრუება
2025 წლის სეზონს განსაკუთრებით ფერარის გულშემატკივრები ელოდებოდნენ, რადგან გუნდმა ბოლიდი სრულად განაახლა და 7-გზის ჩემპიონი, ლუის ჰამილტონი დაიმატა, რომელიც შარლ ლეკლერს შეუწყვილდა. პრეტესტებზე იტალიური გუნდის ბოლიდი საკმაოდ კარგად გამოიყურებოდა და სეზონის ერთ-ერთ მთავარ ფავორიტადაც მოიაზრებოდა.
ფერარის პრობლემები კი ავსტრალიის გრან პრის პრაქტიკებზე გამოჩნდა და ნათელი გახდა, რომ წითლებს არ ჰქონდათ ის ტემპი, რაც გამარჯვებისთვის საკმარისი იქნებოდა. ვარაუდი შაბათს, კვალიფიკაციაზე გამართლდა, როდესაც ლეკლერმა მე-7, ხოლო ჰამილტონმა მე-8 პოზიცია დაიკავა და ლიდერებს ვერ მიუახლოვდნენ. აღსანიშნავია, რომ ფერარიზე წინ კვალიფიკაცია უილიამსმა და რედ ბულ რეისინგმა დაასრულეს.
ინსაიდერულმა წყაროებმა გაავრცელეს ინფორმაცია, რომ ფერარის ბოლიდები წვიმის პარამეტრებზე ჰქონდა მორგებული და ფსონი რბოლაზე ჰქონდა დადებული, თუმცა, იტალიელებს არ კვირას ჰქონდათ საკმარისი ტემპი. აღსანიშნავია, რომ რბოლის ბოლოში ფერარიში სტრატეგიული შეცდომაც დაუშვეს და დაგვიანებული პიტ სტოპის გამო პოდიუმის შანსი გაუშვეს ხელიდან. საბოლოოდ, შარლ ლეკლერი მე-8, ხოლო ლუის ჰამილტონი მე-10 ადგილს დასჯერდა და ფერარიმ მხოლოდ 5 ქულის მოპოვება მოახერხა.
მერსედესი — ჩუმი ფავორიტი დიდი ოთხეულიდან
სეზონის წინ, დიდი ოთხეულის გუნდებიდან ჩემპიონობის ყველაზე დაბალ შანსს ექსპერტები მერსედესს აძლევდნენ და თვლიდნენ, რომ გერმანულ გუნდს სამეულისთვისაც კი გაუჭირდებოდა ბრძოლა. ტოტო ვოლფი 2026 წლის სეზონისთვის ემზადება და წლევანდელი სეზონისთვის ბოლიდში დიდი ცვლილებები არ შეუტანია. ცალკე აღნიშვნის ღირსია საკადრო პრობლემები, რომელიც ლუის ჰამილტონის წასვლამ გამოიწვია და გუნდმა ყველაზე გამოცდილი პილოტი დაკარგა.
ავსტრალიის გრან პრის კვალიფიკაციაზე მერსედესის ახალწვეულმა, ანდრეა კიმი ანტონელიმ ცუდად იასპარეზა, პირველივე სეგმენტში გამოეთიშა ბრძოლას და საბოლოოდ, მე-16 ადგილი დაიკავა. ჯორჯ რასელი კი მესამე სეგმენტში გადავიდა და კვალიფიკაცია მე-4 პოზიციაზე დაასრულა, რამაც გერმანული გუნდის გულშემატკივრებს იმედი გაუჩინა. რბოლა კი ზღაპრული გამოდგა, რასელი მესამე ადგილით პოდიუმზე ავიდა, ხოლო ანტონელიმ მე-4 ადგილზე დააფინიშა და მერსედესი 27 ქულით კონსტრუქტორთა ცხრილში მაკლარენთან ერთად გალიდერდა.
სიურპრიზები ავსტრალიის გრან პრიზე
2025 წლის სეზონის პირველი გრან პრი საკმაოდ ქაოტური გამოდგა და მოულოდნელი შედეგებიც დაფიქსირდა, რაშიც თავისი წვლილი რა თქმა უნდა ცვალებადმა ამინდმა გამოიწვია. რბოლა წვიმაში დაიწყო, შემდეგ ტრასა გაშრა და მრბოლელებმა მშრალი ტიპი საბურავებზე დაიწყეს გადასვლა, ხოლო რამდენიმე წრეში ამინდის ცვლილები გამო კვლავ საწვიმარი საბურავების დაყენება მოუწიათ.
კვალიფიკაციიდან მოყოლებული კარგად გამოიყურებოდა და უილიამსი და რეისინგ ბუსლი და რბოლაშიც კარგი სარბოლო ტემპი შემოგვთავაზეს. პირველივე წრეზე კარლოს საინსის ავარია იდეალურად დააბალანსა ალექს ალბონმა, მე-5 ადგილი დაიკავა და უილიამსს 10 ქულა მოუტანა. ისაკ ჰაჯარის გამოთიშვის შემდეგ კი რეისინგ ბულსის ლიდერობა საკუთარ თავზე იუკი ცუნოდამ აიღო, 45-ე წრეზე მეორე ადგილზეც კი გადავიდა, თუმცა, ბოქსებში დაგვიანებული შესვლის გამო საბოლოოდ ქულების მიღმა, მე-12 პოზიციაზე გავიდა.
ცუდი კვალიფიკაციის შემდეგ, სიურპრიზი შემოგვთავაზა კიკ ზაუბერის გამოცდილმა პილოტმა, ნიკო ჰულკენბერგმა, რომელმაც რბოლა მე-17 ადგილიდან დაიწყო და საბოლოოდ მე-7 ადგილზე გავიდა, რითაც გუნდს 6 ქულა ჩაუწერა აქტივში. ლანს სტროლმა კი ავსტრალიის გრან პრის რბოლაზე 7 პოზიცია მოიგო და მე-6 ადგილი დაიკავა. აღსანიშნავია, რომ მისი გამოცდილი თანაგუნდელი, ორგზის ჩემპიონი ფერნანდო ალონსო რბოლას 32-ე წრეზე გამოეთიშა.
ასე დასრულდა 2025 წლის სეზონის პირველი გრან პრი, რომელსაც ავსტრალიამ უმასპინძლა და კარგად გამოჩნდა გუნდების ძლიერი და სუსტი მხარეები. წინ ჩინეთის გრან პრია, რომელიც 21-23 მარტს გაიმართება.
