"შავი ლომი" ევროპის პროფესიული საკლუბო რაგბის 2026/27 წლების სეზონს, საქართველოში, უელსურ "ოსფრიზთან" მატჩით გახსნის."
ჩელენჯ თასზე სეზონს ჩვენი გუნდი 17 ოქტომბერს უელსელებთან საშინაო მატჩით დაიწყებს. ჯერჯერობით უცნობია რომელ სტადიონზე გაიმართება მომავალი შეხვედრა. ჩელენჯ თასის განვლილ სამ სეზონში უელსურ გუნდს ორჯერ ვეთამაშეთ - ორივეჯერ "სქარლეთს", მაგრამ ორივე შეხვედრა სტუმრად გავმართეთ და უელსელები საქართველოში პირველად ჩამოვლენ.
ტურნირზე "შავმა ლომმა" პირველი, ისტორიული გამარჯვება სწორედ უელსელებთან მოიპოვა, როდესაც "სქარლეთს" სტუმრად 2023 წელს 23:7 სძლია. ამ გუნდს მეორედ 2024 წელს, ასევე სტუმრად შევხვდით და მეტოქემ რევანში აიღო - 36:18.
მეორე და მესამე ტურის მატჩებს საფრანგეთში გავმართავთ. ფრანგულ გრანდ "ტულონს" “სტად მაიოლზე” 12 დეკემბერს ვეწვევით, ნაახალწლევს კი, 2027 წლის 10 იანვარს "ვანს" “სტად დე ლა რაბინეზე” შევერკინებით.
"ტულონთან" აქამდე არასდროს გვითამაშია, "ვანი" კი სამიდან ერთ-ერთი გუნდია, რომლისთვისაც ჩელენჯ თასზე მოგვიგია. ეს 2024 წლის 7 დეკემბერს მოხდა, როდესაც "ვანი" “მიხეილ მესხზე” გვეწვია და 22:19 დავამარცხეთ. ფრანგებთან ერთხელ სტუმრადაც მოგვიგია. ჩელენჯ თასის გასულ სეზონში, 2026 წლის 10 იანვარს "მონტობანს" 31:28 ვძლიეთ.
ჩელენჯ თასის ჯგუფურ ეტაპს 17 იანვარს საქართველოში, შოტლანდიურ "ედინბურგთან" მატჩით ვასრულებთ. თამაშის ჩატარების ზუსტი ადგილი მოგვიანებით გაირკვევა. ტურნირზე "ედინბურგთან" ერთხელ უკვე გვითამაშია. 2025 წლის იანვარში სქოთებს სტუმრად შევერკინეთ და მასპინძლებმა 36:15 გაიმარჯვეს.
ზემოთ ჩამოთვლილ გუნდებთან ერთად მესამე ჯგუფშია ინგლისური "ჰარლიქვინსი", რომელთანაც თამაში არ მოგვიწევს. ოთხი ტურის შემდეგ, ჯგუფის ოთხი მოწინავე გუნდი ფლეი ოფში გადის.
