დღეს, პსჟ-ს ათიანი არის ოსმან დემბელე, რომელიც ახლა კარიერის საუკეთესო პერიოდს ატარებს. საინტერესოა, რომ 10-იანისგან განსხვავებით, დედაქალაქელებს წარსულში არასდროს ჰყოლიათ დიდი 7-იანი, რა თქმა უნდა, კილიან მბაპეს გამოჩენამდე. ვარსკვლავურმა ფორვარდმა პარიზელთა თანამედროვე ისტორია სწორედ ამ ნომრით დაწერა.
ფრანგმა თავდამსხმელმა "ლურჯ-წითლები" დატოვა გუნდის ყველა დროის საუკეთესო ბომბარდირის სტატუსით (308 შეხვედრა, 256 გოლი) და ბევრის აზრით, დედაქალაქური კლუბის ყველა დროის საუკეთესო მოთამაშეც სწორედ ის არის. დღეს, ლუის ენრიკეს გუნდის ექს-ლიდერი უკვე მადრიდის რეალშია, მისი ნომრით კი ხვიჩა კვარაცხელია თამაშობს.
სწორედ ქართველი შემტევი მიიჩნევა პარკ დე პრენსის ბინადრების შემდეგ დიდ შვიდიანად და 26 წლის თავდამსხმელის საქმის გამგრძელებლად. ნაპოლის ექს-ლიდერის პირველი ნაბიჯები პარის სენ-ჟერმენში მართლაც შთამბეჭდავია, მან უმოკლეს დროში მოახერხა ახალ გარემოში ადაპტირება და გუნდის წამყვანი მოთამაშის სტატუსის მიღება.
"დონატელოს" მემკვიდრეობა საიმედო ხელშია, ეს უკვე ახლაც ჩანს. ჩემპიონთა ლიგის მოგების შემთხვევაში კი პსჟ-ს ახალი შვიდიანი სამუდამოდ ჩაეწერება ოქროს ასოებით დედაქალაქური კლუბის ისტორიაში. ერთი სიტყვით, დიდ 10-იანებთან ერთად, შეგვიძლია ვთქვათ, რომ პარიზელებს უკვე დიდი 7-იანებიც ჰყავთ.
