რთული სათქმელია რამდენად რეალურია ეს ინფორმაცია, იმის გათვალისწინებით, რომ თავად ორგანიზაციას ჯერჯერობით არაფერი დაუდასტურებია. აქედან გამომდინარე, სანამ UFC ჩუმად არის, შეგვიძლია ეს ყველაფერი ჭორად მივიჩნიოთ. რაც არ უნდა იყოს, ფაქტია, რაღაც სიმართლის მარცვალი ამ ყველაფერში ნამდვილად არის.
ქართველი ჩემპიონისა და ჰავაელი მებრძოლის დაპირისპირება ჯერ კიდევ გაზაფხულზე დაანონსდა. ჩხუბის სავარაუდო თარიღად აგვისტო-სექტემბრის შუალედი სახელდებოდა, მაგრამ ოფიციალური ხელმოწერა ჯერ კიდევ არ არის. "ელ მატადორი" გაჭიანურებაში "კურთხეულს" ადანაშაულებს, ის კი პირიქით - ჩემპიონს.
ისინი გამუდმებით იწვევენ ერთმანეთს სოციალურ ქსელებსა და სხვადასხვა ინტერვიუში, თუმცა UFC არაფერს ადასტურებს. 27 წლის ჩემპიონს იმდენად სურს ჩხუბი, რომ ის სხვა ვარიანტებზეც კი თანახმაა. ამის გარდა, თოფურიას გეგმებშია აბუ-დაბისა და მადრიდში გამოსვლა, თუნდაც 32 წლის მებრძოლის გარეშე.
ქართველი ჩემპიონის სავარაუდო მოწინააღმდეგეებში განიხილებიან კონორ მაკგრეგორი, ისლამ მახაჩევი და მოვსარ ევლოევი, თუმცა სამივე ვარიანტი ნაკლებად სავარაუდოა. ილიას შემდეგი მეტოქე, უდიდესი ალბათობით, მაინც ჰოლოუეი იქნება, მაგრამ როდის და სად, ჯერჯერობით უცნობია. დაველოდოთ ორგანიზაციის ანონსს.
რაც შეეხება "მანქანას", გასული წლის აგვისტოში "შუგამ" დაამარცხა ალჯემეინ სტერლინგი, რის შემდეგაც ნათელი გახდა, რომ ახალი ჩემპიონის შემდეგი მოწინააღმდეგე ქამრის ყოფილი მფლობელის საუკეთესო მეგობარი უნდა ყოფილიყო. აღნიშნული ჩხუბი არ შედგა, ამერიკელმა ჩემპიონობა დაიცვა ჩიტო ვერასთან, ქართველმა კი ჰენრი სეხუდოს მოუგო.
მომავალი მოწინააღმდეგეები ერთმანეთს პრაქტიკულად ყოველდღე ტროლავენ, თუმცა კონკრეტული ნაბიჯები UFC-ის მხრიდან არ გადადგმულა. ბოლოს განვიხილოთ, თუ რამდენად რეალურია "ელ მატადორისა" და დვალიშვილის ისევ ერთ ქარდზე ყოფნა. დიახ, ქართველებისთვის ლეგენდად ქცეულ 298-ე ღონისძიებაზე ორივემ იჩხუბა.
27 წლის მებრძოლმა დაამარცხა ალექსანდერ ვოლკანოვსკი, რითაც გახდა ქვემსუბუქი დივიზიონის ჩემპიონი, მერაბმა კი ზემოთ ხსენებული სეხუდო გაანადგურა. ალბათ იფიქრებთ, გავამეოროთ? რატომაც არა?! თუმცა გასათვალისწინებელია ერთი დეტალი: ნაკლებად სავარაუდოა, რომ ორგანიზაციამ ორი ხმაურიანი საჩემპიონო ჩხუბი ერთ ქარდში ჩასვას.
თოფურია - მაქსი, "მანქანა" - ო'მალი, წყვილები, რომლებისგანაც ორი დამოუკიდებელი (და საკმაოდ ხმაურიანი) ივენთის გაკეთება არის შესაძლებელი. ორი ღონისძიება ერთის ნაცვლად კი ორმაგ მოგებას ნიშნავს. ცხადია, ეს ყველაფერი ვარაუდებია, შერეული საბრძოლო ხელოვნებების სამყარო კი ორგანიზაციის ოფიციალური ანონსის მოლოდინშია.
