თბილისში 70 000-ს მაყურებელზე გათვლილი სტადიონი აშენდება და ჩვენი ქვეყანა 2028 წლის ჩემპიონთა ლიგის ფინალის მასპინძლობაზე შეიტანს განაცხადს, - ამის შესახებ დღეს საქართველოს პრემიერ მინისტრმა, ირაკლი კობახიძემ მთავრობის სხდომაზე განაცხადა:
„ჩვენ ვამაყობთ ჩვენი სპორტსმენების წარმატებით. ჩვენ უნდა ვიზრუნოთ სპორტზე და კონკრეტულად ფეხბურთზე. მინდა დავაანონსო მნიშვნელოვანი მეგაპროექტი, რომელიც ფეხბურთსა და რაგბის უკავშირდება. გვინდა ავაშენოთ ახალი სტადიონი, რომელიც არსებითად სპორტის ამ ორ სახეობას მოემსახურება. გათვლილი იქნება 70 000 მაყურებელზე. იქნება თანამედროვე, უმაღლესი სტანდარტების სტადიონი, რომელიც მოგვცემს იმის საშუალებს, რომ ვუმასპინძლოთ უმაღლესი რანგის მატჩებს ჩვენს დედაქალაქში, მათ შორის ჩემპიონთა ლიგის ფინალის ჩათვლით. ეს იქნება ბრიტანული სტილის სტადიონი, რომელსაც სარბენი ბილიკები არ აქვს. ამ დროს მაქსიმალურად ემოციურია კავშირი გულშემატკივარსა და გუნდს შორის, რა თქმა უნდა, ეს ყველაფერი გუნდის წარმატებაზეც უფრო აისახება. ეს იქნება უმაღლესი სტანდარტის სტადიონი.
სავარაუდო ლოკაცია იქნება ახალი აეროპორტის მიმდებარე ტერიტორია, ასეთ პირობებში ახალი აეროპორტის მშენებლობა წაადგება სტადიონის სწორად დატვირთვას.
აქვე გეტყვით, რომ ჩვენ შევიტანთ განაცხადს 2028 წლის ჩემპიონთა ლიგის ფინალის მასპინძლობაზე. ეს იქნება მნიშვნელოვანი საჩუქარი ქართული ფეხბურთისთვის და გულშემატკივრისთვის. თბილისს ექნება უნიკალური სტადიონი 70 000 გულშემატკივარზე გათვლილი. რა თქმა უნდა, სათანადოდ განხორციელდება ეს პროექტი. აქტიური მუშაობა იქნება საჭირო კულტურისა და სპორტის სამინისტროსგან. ფინანსთა სამინისტროს უნდა ვთხოვოთ ამ პროექტის სათანადო უზრუნველყოფა," - განაცხადა ირაკლი კობახიძემ.
თბილისში 70 000 მაყურებელზე გათვლილი სტადიონი აშენდება, სადაც შესაძლოა, ჩემპიონთა ლიგის ფინალი ჩატარდეს
208545
