პრეზენტაცია თბილისის მუნიციპალიტეტის საკრებულოს სპორტისა და ახალგაზრდულ საქმეთა კომისიის ინიციატივით და ა(ა)იპ “სპორტის მართვის მეთოდოლოგიის და ტექნოლოგიების ასოციაციის" ორგანიზებით, კამპანიის, ,,როდესაც სპორტი ცვლის სამყაროს“ ფარგლებში გაიმართა.
ღონისძიებას თბილისის საკრებულოს თავმჯდომარე გიორგი ტყემალაძე, სპორტისა და ახალგაზრდულ საქმეთა კომისიის თავმჯდომარე გურამ ოქროპირიძე, საკანონმდებლო, აღმასრულებელი და ადგილობრივი ხელისუფლების, ასევე სპორტული ფედერაციების წარმომადგენლები, სკოლის დირექტორები, პედაგოგები და მოსწავლეები დაესწრნენ.
სასკოლო ლიგის განვითარების სტრატეგიული გეგმის დოკუმენტი გასულ სეზონს შეიქმნა და ხუთი წლის განმავლობაში განსახორციელებელი აქტივობების სამოქმედო გეგმას მოიცავს.
გეგმის მიხედვით, სპორტის 20-ზე მეტ სახეობაში, სისტემატიური და ერთი ელექტრონული პლატფორმის ქვეშ გაერთიანებულ სასკოლო ტურნირებში, ყოველწლიურად 100 000 მოსწავლე ჩაერთვება.
სტრატეგიული გემის შესახებ LaGazzetta.ge-სთან სასკოლო ლიგის კოორდინატორმა, ოთო აბულაძემ ისაუბრა:
„ძალიან გვიხარია, რომ „სასკოლო ლიგა“ წლიდან - წლამდე იზრდება და ჩართულობა იმატებს. მადლობა მინდა გადავუხადო საქართველოს მთავრობას, თბილისის საკრებულოს, თბილისის მერიასა და ყველა პარტნიორს. პროექტი ისეთი ტემპით განვითარდა, რომ საჭირო გახდა სტრატეგიული გემის შემუშავება. ვფიქრობთ, ძალიან მალე "სასკოლო ლიგაში" 100 000 მოსწავლე გვეყოლება ჩართული. ეს არის პროექტი, რომელიც ცვლის სამყაროს და ჩვენი დევიზიც სწორედ ესაა - „სპორტი ცვლის სამყაროს."
2023-2024 სასწავლო წელს სასკოლო ლიგა თბილისსა და რეგიონებში სპორტის 15 სახეობაში ჩატარდა. ტურნირში 500-მდე სკოლის 12 000-მდე მოსწავლემ მიიღო მონაწილეობა.
,,თბილისის სასკოლო ლიგის“ 2023-2024 წწ. სეზონის საუკეთესო სასკოლოლიგელის ნომინაციაში გამარჯვებულმა, ანასტასია ქოქიაშვილმა LaGazzetaa.ge-სთან საუბარში განაცხადა, რომ ეს მისთვის საუკეთესო გამოცდილება იყო:
„საუკეთესო სასკოლოლიგელი გავხდი, რაც ძალიან მახარებს და ჩემთვის დიდი მოტივაციაა. სიმართლე გითხრათ, არ ველოდი ამ ჯილდოს. პროექტში მონაწილეობით საუკეთესო გამოცდილება მივიღე. ჭადრაკსა და ფრენბურთში ვასპარეზობდი. ჭადრაკში ინდივიდუალურ და ასევე გუნდურ ასპარეზობაში გავიმარჯვე, ფრენბურთში პირველი ტურის საუკეთესო მექულე და გულშემატკივართა რჩეული გავხდი."
"სასკოლო ლიგის" პარტნიორთა შორისაა SMH Sports-ი. SMH Sports-ის დამფუძნებლის, ლაშა მაჭავარიანის განცხადებით, სასკოლო ლიგასთან თანამშრომლობა და ქვეყანაში ჯანსაღი ცხოვრების წესის პოპულარიზაციის ხელშეწყობა SMH Sports-სთვის მნიშვნელოვანია:
„SMH Sports-ი მოხარულია, რომ სასკოლო ლიგის პარტნიორია. ქვეყანაში სპორტის განვითარება, მით უფრო, სასკოლო ასაკში ძალიან მნიშვნელოვანია. განსაკუთრებით სასიხარულოა, არსებული მზარდი სტატისტიკა, რასაც სასკოლო ლიგა წლიდან - წლამდე აფიქსირებს. წარმატებას ვუსურვებთ პროექტს და სასკოლო ლიგაში ჩართულ ახალგაზრდებს. SMH Sports-ი ყოველთვის მზად არის მსგავს პროექტებს მხარი დაუჭიროს,“ - განაცხადა LaGazzetaa.ge-სთან ლაშა მაჭავარიანმა.
„სასკოლო ლიგა“ 2019 წელს, ქალაქ თბილისის მუნიციპალიტეტის საკრებულოს სპორტის და ახალგაზრდულ საქმეთა კომისიის ინიციატივით, კამპანია „როდესაც სპორტი ცვლის სამყაროს“ ფარგლებში, ა(ა)იპ “ სპორტის მართვის მეთოდოლოგიის და ტექნოლოგიების ასოციაციამ“ დააფუძნა. პროექტი, ინოვაციური მეთოდების გამოყენებასა და მოტივაციის ამაღლებაზე ორიენტირებული საშეჯიბრო სისტემაა, რაც ქვეყანაში როგორც სასკოლო სპორტის, ასევე მასობრივი და პროფესიული სპორტის განვითარებასა და ჯანსაღი ცხოვრების წესის პოპულარიზაციას უწყობს ხელს.
პროექტი საქართველოს ბავშვთა და სასკოლო სპორტის ეროვნული ფედერაციის ეგიდით ხორციელდება.
ფოტო: თბილისის საკრებულო
