ორიენტირება სპორტის სახეობაა, რომელიც მონაწილეებისგან ფიზიკურ გამძლეობას, სისხარტისა და ნავიგაციის უნარების გამოყენებას მოითხოვს. შესაბამისი რუკით და კომპასით აღჭურვილი მონაწილეები, განსაზღვრულ ტერიტორიაზე ეძებენ მონიშნულ საგუშაგოებს (ე.წ. „ჩეკპოინტს“). მონაწილის მიზანია უმოკლეს დროში, წინასწარ განსაზღვრული თანმიმდევრობით, მიაღწიოს ყველა საგუშაგოს. აღსანიშნავია, რომ ორიენტირება საერთაშორისო ოლიმპიური კომიტეტის მიერაა აღიარებული და მსოფლიო მასშტაბით მას რამდენიმე მილიონი მიმდევარი ჰყავს. სპორტის ეს სახეობა განსაკუთრებით პოპულარულია სკანდინავიის ქვეყნებში, ევროკავშირის წევრ სახელმწიფოებსა და ჩრდილოეთ ამერიკის კონტინეტზე.
სპორტული ორიენტირება აერთიანებს რამდენიმე სახეობას: სირბილი, სამთო-ველო, სათხილამურო, ტრეილ (ფიზიკური გადაადგილების შეზღუდვის მქონე პირებისთვის).
შეჯიბრის მონაწილეებმა, მათთვის დარიგებული რუკის გამოყენებით, რაც შეიძლება ნაკლებ დროში უნდა შეძლონ რუკაზე დატანილი ყველა საკონტროლო სადგურზე (ორგანიზატორების მიერ განსაზღვრული თანმიმდევრობით, რომელიც მონიშნულია ციფრებით) მისვლა და ელექტრონული ჩიპის მიდება. გამარჯვებული არის ის, ვინც ყველაზე ნაკლებ დროში შეძლებს ყველა საკონტროლო სადგურზე, მათ შორის ფინიშის საკონტროლო სადგურზე, ელექტორნული ჩიპის მიდებას.
იმ შემთხვევაში, თუ მონაწილემ არასწორი თანმიმდევრობით მიადო ელექტრონული ჩიპი საკონტროლო სადგურებს (მაგალითად ჯერ მე-3 და მერე მე-5 საკონტროლო სადგურს მიადო ჩიპი), შეჯიბრის გასაგრძელებლად, აუცილებელია ის დაუბრუნდეს მე-3 საკონტროლო სადგურს, მიადოს ელექტრონული ჩიპი და შემდგომ მივიდეს მე-4 საკონტროლო სადგურზე ჩიპის მიდების მიზნით. არასწორი თანმიმდევრობით საკონტროლო სადგურებზე ჩიპის მიდება გამოიწვევს მონაწილის შედეგების ანულირებას.
