საქართველოს სპორტის მინისტრმა შალვა გოგოლაძემ კონტაქტური კარატეს ახალგაზრდულ და ეროვნულ ნაკრებებს ევროპის ჩემპიონატზე მიღწეული წარმატება მიულოცა. შეხვედრაზე მინისტრმა სპორტსმენებს მადლობა გადაუხადა მიღწეული შედეგებისთვის და მომავალშიც გამარჯვება უსურვა.
ევროპირველობაზე საქართველოს კონტაქტური კარატეს ეროვნულმა და ახალგაზრდულმა ნაკრებმა გუნდებმა ასპარეზობა 15 მედლით დაასრულეს.
ევროპის ჩემპიონატის პირველ დღეს საქართველოს კონტაქტური კარატეს ახალგაზრდულმა ნაკრებმა იასპარეზა და შეჯიბრება ცხრა მედლით დაასრულა; აქედან სამი ოქროს, ორი ვერცხლისა და ოთხი ბრინჯაოს მედალია.
ახალგაზრდებს შორის ევროპის ჩემპიონობა ნინო შუბითიძემ (-55 კგ), გიორგი ძნელაძემ (- 60კგ) და საბა ჭრელაშვილმა (+ 80კგ) იზეიმეს, ვიცე-ჩემპიონები ნანა ნიკურაძე (- 55კგ) და ამირან ტატულიშვილი (- 80კგ) გახდნენ, ხოლო ბრინჯაოს მედლები კი გიორგი ბარნაველმა (- 60კგ), ედგარ აბგარიანმა (- 65კგ), საქართველოს სახელით მოასპარეზე ოსკარ ჰინშლეიმ (- 65კგ) და მალხაზ ქაჯაიამ (- 70კგ) მოიპოვეს.
ტურნირის მეორე დღეს კონტაქტური კარატეს ეროვნულმა ნაკრებმა იასპარეზა და ექვსი - ორი ოქროს, ორი ვერცხლისა და ორი ბრინჯაოს მედალი მოიპოვა; ჩემპიონობა მინდია მგელაძემ (- 60კგ) და ლაშა ოზბეთელაშვილმა (- 80კგ) იზეიმეს, ვიცე-ჩემპიონები დავით ძნელაძე (- 60კგ) და ლაშა ბაბუაძე (- 80კგ) გახდნენ, ბრინჯაოს მედლები კი მარიამ წიკლაურმა (- 54კგ) და ლაშა შანთაძემ (- 60კგ) მოიპოვეს.
საქართველომ კონტაქტურ კარატეში ევროპის ჩემპიონატს მესამედ, ბათუმმა კი პირველად უმასპინძლა. ევროპის ჩემპიონატი, რომელზეც 22 ქვეყნის 500-ამდე სპორტსმენი ასპარეზობდა, 9 და 10 მაისს გაიმართა.
შეხვედრას ესწრებოდნენ სპორტის მინისტრის მოადგილეები - ირაკლი მეძმარიაშვილი და ირაკლი დოლაბერიძე, საქართველოს კონტაქტური კარატეს ეროვნული ფედერაციის პრეზიდენტი ავთანდილ შენგელია და ფედერაციის სხვა წარმომადგენლები.
