ახალი ზელანდიის ქალაქ დანიდინში მიმდინარე 2025 წლის ყინულის ჰოკეის მსოფლიო ჩემპიონატის მე-2 დივიზიონის B ჯგუფში მეორე ტურის შეხვედრები ჩატარდა.
საქართველოს ეროვნულმა ნაკრებმა ტურნირის მასპინძელი და ფავორიტი ახალი ზელანდიის ეროვნული ნაკრები 5:0 დაამარცხა. ამ მატჩამდე საქართველოს ეროვნული ნაკრები ახალ ზელანდიას ორჯერ დაუპირისპირდა და ორივეჯერ წააგო.
დუბლი ტიმურ ბეშაროვმა შეასრულა. თითოჯერ თავი მაკარ ნიკიშანინმა, დანილ მეტლიუკმა და დანილ დავიდოვმა გამოიჩინეს.
საქართველოს ეროვნული ნაკრების რიგებიდან მატჩის საუკეთესო მოთამაშედ დებიუტანტი ტიმურ ბეშაროვი დასახელდა.
შეგახსენებთ, საქართველოს ნაკრებმა ჯგუფის პირველ შეხვედრაში ისლანდიის ეროვნულ ნაკრებს 4:0 მოუგო.
საქართველოს ნაკრები 6 ქულით ჯგუფში პირველ ადგილზეა, შემდეგ 3-3 ქულით ტაიპეი, ისლანდია, ბულგარეთი და ახალი ზელანდია. ტაილანდს კი ქულა არ მოუპოვებია.
ტურნირში გამარჯვებული პირველადგილოსანი გუნდი აღზევდება მე-2 დივიზიონის A ჯგუფში. საქართველოს ყინულის ჰოკეის ეროვნული ნაკრები დაკომპლექტებულია როგორც ადგილობრივ ჩემპიონატში მოასპარეზე მოთამაშეებით, ასევე ლეგიონერებით.
საქართველოს ჰოკეის ნაკრები მორიგ შეხვედრას 30 აპრილს ბულგარეთის წინააღმდეგ გამართავს.
2025 წლის ყინულის ჰოკეის მსოფლიო ჩემპიონატის მე-2 დივიზიონის B ჯგუფის მატჩების განრიგი
30 აპრილი. 08:30. საქართველო - ბულგარეთი
2 მაისი. 05:00. საქართველო - ჩინეთი ტაიპეი
3 მაისი. 05:00. საქართველო - ტაილანდი
