პრემიერ ლიგაში ჯვარედინი მყესები გაიწყვიტა ორმა ფეხბურთელმა - როდრი ერნანდესმა და ერსონ მოსკერამ. ორივესთვის სეზონი უკვე დასრულებულია. ესპანელი ჩამშლელი დაზიანების მიღებამდე ცოტა ხნით ადრე, სწორედ გადატვირთული გრაფიკის გამო უკმაყოფილებას გამოხატავდა. მისი ტრავმა ლონდონის არსენალთან მატჩში მოხდა.
რაც შეეხება კოლუმბიელ ცენტრალურ მცველს, მან ჯვარედინი მყესები გაიწყვიტა 21 სექტემბერს, ბირმინგემის ასტონ ვილასთან შეხვედრაში. პრემიერ ლიგის მსგავსად, პრიმერა დივიზიონსაც ჰყავს ორი უიღბლო მოთამაშე: დანი კარვახალი და მარკ ბერნალი. პირველმა დაზიანება მიიღო გასულ უიკენდზე, ვილიარეალთან მატჩში.
მადრიდის რეალმა ესპანელ მარჯვენა მცველს გამოუცხადა სრული მხარდაჭერა და მას კონტრაქტი ერთი წლით გაუხანგრძლივა. რაც შეეხება ბარსელონას შუახაზელს, მან ყველასთვის მოულოდნელად სეზონი დაიწყო მთავარ გუნდში, მაგრამ რაიო ვალეკანოსთან მატჩი მისთვის ფატალური გამოდგა. "სამეფო კლუბმაც" და კატალონიელებმაც თავიანთი მოთამაშეები სეზონის ბოლომდე დაკარგეს.
ბოლოს კი სერია ა, სადაც ჯვარედინი მყესები ოთხმა ფეხბურთელმა გაიწყვიტა. სეზონის დაწყების წინ, საბა საზონოვი განათხოვრების წესით ტორინოდან გადავიდა ემპოლიში, მაგრამ ახალ კლუბში კარიერის რეანიმირება მან ვერ შეძლო, მიზეზი: ჯვარედინი მყესების გაწყვეტა. ქართველი უკანახაზელისთვისაც სეზონი დასრულებულია.
ჯანლუკა სკამაკას ჰქონდა ძალიან კარგი სადებიუტო სეზონი ბერგამოს ატალანტაში, რომლის შემადგენლობაში მან 44 შეხვედრაში 19 გოლი გაიტანა. სამწუხაროდ, იტალიელი ფორვარდის წარმატებული სვლა შეწყდა ჯერ კიდევ ზაფხულში, როდესაც მან მყესები გაიწყვიტა. იგივე უიღბლობა დაემართა ტურინის იუვენტუსის უკანახაზის ლიდერსაც, გლეისონ ბრემერს.
გასულ შაბათ-კვირას სეზონი დაასრულა "ხარების" ლიდერმა, დუვან საპატამაც, რომელმაც ჯვარედინი მყესები მილანის ინტერთან შეხვედრაში გაიწყვიტა. გარცელებული ინფორმაციით, "გრანატა" კოლუმბიელი ფორვარდის შემცვლელად განიხილავს მარიო ბალოტელის, რომელიც ამ დროისთვის თავისუფალი აგენტია.
იხილეთ ჩვენი პოდკასტის მორიგი ეპიზოდი
იხილეთ ჩვენი პოდკასტის მორიგი ეპიზოდი
