ნერესის ტრავმას ნაპოლის ფანების პროტესტის გამწვავება მოჰყვა — მას შემდეგ, რაც გუნდი ხვიჩა კვარაცხელიამ დატოვა, იტალიური კლუბი მის შემცვლელად რამდენიმე ვარიანტს განიხილავდა, თუმცა ყველა მთავარი სამიზნის ტრანსფერი ჩაიშალა. სატრანსფერო ფანჯრის ბოლო დღეს კი ნაპოლიმ ნოა ოკაფორი 6-თვიანი იჯარით დაიმატა, რამაც გულშემატკივრების გაბრაზება გამოიწვია.
ნაპოლის ფანების პროტესტი სწორედ აქედან დაიწყო, დავიდ ნერესის ტრავმის შემდეგ კი გულშემატკივრებმა სოციალურ ქსელებში ახალი შეტევა დაიწყეს:
"სად წავიდა კვარაცხელიაში აღებული €70 მილიონი? რატომ არ გაძლიერდა გუნდი?"
"ნერესის ტრავმის შემდეგ, ვინ უნდა ითამაშოს შეტევაში? წინ ურთულესი პერიოდი გველოდება"
"კვარაცხელია პსჟ-ში იანვრის შუა რიცხვებში გადაბარგდა, მას შემდეგ კი გუნდს ორ კვირაზე მეტი ჰქონდა ახალი ფეხბურთელის დასამატებლად... რატომ გაწირეს გუნდი?"
"სკუდეტოს ფავორიტები ვიყავით და ახლა ოთხეულშიც თუ შევალთ, ესეც გასარკვევია"
"ანტონიო კონტეს სიჩუმე მიუღებელია... ის ამ ყველაფერს უნდა აპროტესტებდეს"
"დე ლაურენტისმა კიდევ ერთხელ მოგვატყუა"
ბოლო 24 საათში ასეთი შინაარსის პოსტებსა და კომენტარებს თითქმის ყველა სოციალურ ქსელში შეხვდებოდით. როგორც ჩანს, ნაპოლის ფანები ძალიან გაბრაზებულები არიან.
