2025 წლის ჯუდოს ევროპის ჩემპიონატის ინდივიდუალური ჩათვლის ბოლო დღეს, საქართველოს ნაკრებმა ერთი ოქროს მედლის მოპოვება შეძლო.
-100 კგ წონით კატეგორიაში ჩემპიონი ილია სულამანიძე გახდა — 23 წლის ქართველმა ფინალამდე სერბი, იტალიელი და რუსი სპორტსმენები დამაჯერებლად დაამარცხა.
ოქროსთვის ბრძოლაში, ილია სულამანიძე აზერბაიჯანელ ზელიმ კოცოევს დაუპირისპირდა, ოლიმპიადაზე განცდილი მარცხისთვის რევანში აუღო და კარიერაში პირველად მოიგო ევროპის ჩემპიონატი.
ამრიგად, საქართველოს ნაკრებმა 2025 წლის ევროპის ჩემპიონატის ინდივიდუალური ჩათვლა 2 ოქროს და 2 ვერცხლის მედლით დაასრულა — ჩემპიონობა გიორგი სარდალაშვილმა და ილია სულამანიძემ იზეიმეს, ხოლო ვერცხლს ეთერ ლიპარტელიანი და ტატო გრიგალაშვილი დასჯერდნენ.
