ხვიჩა კვარაცხელიას პსჟ-ში გადასვლის შემდეგ კი ევროპულმა პრესამ "ლურჯების" საკუთრებაში მყოფი თავდამსხმელის სახელი ფრანგულ გუნდს უფრო აქტიურად დაუკავშირა. ამ ყველაფერთან ერთად, პრესაში ტრიალებს კიდევ ერთი მოსაზრება: პარიზელებს აქამდეც ჰქონდათ "აძურის" ყოფილი მე-9 ნომრის გაფორმების შესაძლებლობა, მაგრამ ტრანსფერი ლუის ენრიკემ დაბლოკა.
ესპანელ მწვრთნელს არ მოსწონს 26 წლის თავდამსხმელის ცხოვრების წესი, რომელიც ღამის კლუბებში სიარულსა და დისციპლინარულ გადაცდომებს მოიცავს. საინტერესოა, რომ ეს მოსაზრება გასული წლის ნოემბერში გააჟღერა სამირ ნასრიმ, რომელმაც აღნიშნა, რომ "ლურჯ-წითლების" ამჟამინდელი სპეციალისტი ოსიმენს არასდროს დაიმატებს.
"მთავარი მიზეზი, თუ რატომ არ ყიდულობს პარის სენ-ჟერმენი ოსიმენს, ენრიკეს ფაქტორი არის. მან მისი ტრანსფერი უკვე არაერთხელ დაბლოკა და ამის მიზეზი ვიქტორის პირადი ცხოვრება არის. ის ღამის კლუბებში სიარულის მოყვარულია, რასაც ლუჩო კატეგორიულად ეწინააღმდეგება", - განაცხადა ყოფილმა ფრანგმა ფლეიმეიქერმა.
