საინტერესოა, რა ფორმაში ხვდებიან ქართული კლუბები მოახლოებულ ევროტურნირებს და უნდა გვქონდეს თუ არა წელს იმედი, რომ 2004 წლის შემდეგ პირველად შევიდეთ ჯგუფში.
დინამო თბილისი
გასულ წლებთან შედარებით, წელს დინამო თბილისს ბევრად ახალგაზრდული შემადგენლობა ჰყავს. კონფერენს ლიგის საკვალიფიკაციო ეტაპზე მათი პირველი მეტოქე მონტენეგროს წარმომადგენელი მორნარ ბარია, რომელმაც ჩემპიონატში მეორე ადგილი დაიკავა. ბევრს იმედი არ აქვს, რომ დინამო ამ ზედმეტად ახალგაზრდული შემადგენლობით წარმატებით იასპარეზებს, თუმცა შესაძლოა, მათი მთავარი კოზირი სწორედ ახალგაზრდების მოტივაცია და მონდომება გამოდგეს. ცოტა ხნის წინ, დინამომ მწვრთნელი შეიცვალა. დინამო თბილისის მთავარ მწვრთნელად 44 წლის ავსტრიელი ფეხბურთის სპეციალისტი - ფერდინანდ ფელდჰოფერი იმუშავებს.
ეროვნული ლიგის მიმდინარე სეზონში დინამოს 22 ქულა აქვს და მე-5 პოზიციას იკავებს. რამდენიმე დღის წინ, მათ სუპერთასის ფინალური შეხვედრა ტორპედოსთან დათმეს. როგორც ზემოთ ვთქვით, დინამოს ახალგაზრდული შემადგენლობა ჰყავს, თუმცა არიან გამოცდილი მოთამაშეებიც, მაგალითად თორნიკე ოქრიაშვილი. კლუბს დაუბრუნდნენ დავით სხირტლაძე და საბა ხვადაგიანი. პირველ შეხვედრას დინამო 11 ივლისს, სტუმრად გამართავს, განმეორებითს კი ერთი კვირის თავზე, დინამო არენაზე.
11 ივლისი, 22:45 მორნარ ბადი - დინამო თბილისი
18 ივლისი, 21:00 დინამო თბილისი - მორნარ ბადი
ტორპედო ქუთაისი
ყველაზე დიდი იმედები ტორპედოზე მყარდება, რაც ლოგიკურია, რადგან კლუბმა ხარისხიანი ლეგიონერები ჩამოიყვანა, დიდი ფული ჩადო და მიზანი დაისახა, რომ უახლოეს მომავალში ევროტურნირების ჯგუფში შევიდეს. როცა გუნდი მიზანდასახულია და კონკრეტული გეგმა აქვს, შედეგიც აუცილებლად მოდის. იმერლებს საქართველოს ჩემპიონატის ერთ-ერთი გამორჩეული ფეხბურთელები - ცოტნე ფაცაცია და ირაკლი ბიძინაშვილი შეუერთდნენ.
სეზონის არც თუ ისე წარმატებული სტარტის შემდეგ, ტორპედომ მოუმატა, ყველა ტურნირზე ზედიზედ 15-მატჩიანი წაუგებელი სერია აქვს და ევროტურნირებს კარგ განწყობაზე ხვდება, რადგან რამდენიმე დღის წინ, საქართველოს სუპერთასის მფლობელი გახდა. ეროვნულ ლიგაში კი მე-2 ადგილს იკავებს და ჩემპიონობისთვის იბრძვის. ჩემპიონატის ბომბარდირი, 11 გოლით, მათი ნორვეგიელი ფორვარდი ბიორნ იონსენია.
კონფერენს ლიგის საკვალიფიკაციო ეტაპზე ტორპედო ალბანურ ტირანას დაუპირისპირდება. პირველი მატჩი 11 ივლისს, ქუთაისში შედგება, განმეორებითი - 18 ივლისს, ალბანეთში.
11 ივლისი, 21:00 ტორპედო ქუთაისი - ტირანა
18 ივლისი, 22:00 ტირანა - ტორპედო ქუთაისი
18 ივლისი, 22:00 ტირანა - ტორპედო ქუთაისი
იბერია
კონფერენს ლიგის პირველ საკვალიფიკაციო ეტაპს იბერია ტოვებს და საქმეში მეორე ეტაპიდან ჩაერთვება. რაც არ უნდა უცნაური იყოს, იბერიამ მთავარი მწვრთნელის პოსტიდან გიორგი მიქაძე დაითხოვა და კლუბს ლევან კორღალიძე დაუბრუნდა. ეს ყველაფერი უცნაური იმიტომაა, რომ მიქაძეს იბერიაში გრძელვადიანი გეგმა ჰქონდა, რაც ასევე, ევროტურნირებზე წარმატებას მოიცავდა.
იბერიას ჯემალ ჯინჯოლავა და იური ტაბატაძე დაუბრუნდნენ, რომლებიც გუნდს განათხოვრებული ჰყავდა. კარგ ფორმაშია ამ გუნდის ლიდერი გიორგი კოხრეიძე. ამასთანავე, იბერიამ გამოცდილი მეკარე, გიორგი მაკარიძე დაიმატა და ევროტურნირებს მზადყოფნაში ხვდება. რაც შეეხება ეროვნულ ლიგას, იქ გუნდს 32 ქულა აქვს და სატურნირო ცხრილში მესამე ადგილს იკავებს.
დინამო ბათუმი
მიუხედავად იმისა, რომ ბათუმს ჩემპიონთა ლიგის პირველ საკვალიფიკაციო ეტაპზე ლუდოგორეცის სახით რთული მეტოქე შეხვდა, კარგი თამაშით გუნდს ჯგუფში შესვლა მაინც შეუძლია, რადგან ჩემპიონის გზა ევროტურნირებზე გაცილებით მარტივია. თუ ბათუმი ჩემპიონთა ლიგის საკვალიფიკაციო ეტაპს ვერ გადალახავს, კონფერენს ლიგაზე გადაერთვება.
თუმცა ბათუმელები ასე არ ფიქრობენ და მთავარი მიზანი ლუდოგორეცის ეტაპის გადალახვაა. მოქმედი ჩემპიონი კლუბი რამდენიმე ფეხბურთელმა დატოვა, მაგრამ შევსება მალევე მოხდა და დემჩენკოს გუნდი მაინც გაძლიერდა. რამდენიმე ლეგიონერის გარდა, ბათუმმა სამტრედიადან გუნდის ლიდერები - რევაზ ინჯგია და დიტო ფაჩულია დაიმატა. ეროვნულ ლიგაში დინამო ბათუმი 31 ქულით მე-4 ადგილზეა.
დინამო ბათუმისა და ლუდოგორეცის პირველი შეხვედრა 10 ივლისს, რაზგრადში შედგება, განმეორებითი კი - 17 ივლისს, ბათუმში.
10 ივლისი, 22:00 ლუდოგორეცი - დინამო ბათუმი
17 ივლისი, 21:00 დინამო ბათუმი - ლუდოგორეცი
