პირველ რიგში, გამოსარჩევია ხვიჩა კვარაცხელია, რომლის პარის სენ-ჟერმენი ლიგა 1-ში მორიგი ჩემპიონობისკენ დამაჯერებლად მიიწევს. საფრანგეთის ჩემპიონატის მთავარი დომინანტი უახლოეს მდევარს, მარსელის ოლიმპიკს ამ დროისთვის 13 ქულით უსწრებს. აღსანიშნავია ისიც, რომ ქართველ ვინგერს ტიტულის მოგების შანსი ერთდროულად ორ ტოპ ლიგაში აქვს.
საუბარია ნაპოლის შესახებ, რომელიც სერია ა-ს საჩემპიონო რბოლაშია ჩაბმული. მართალია, კომოსთან მარცხის შემდეგ, პსჟ-ს შემტევის ყოფილმა გუნდმა პირველი პოზიცია გადაულოცა მილანის ინტერს, მაგრამ დაკარგული ჯერ არაფერია. "პარტენოპეი" მოქმედ ჩემპიონს ამ მომენტისთვის მხოლოდ 1 ქულით ჩამორჩება.
საჩემპიონო რბოლაში არის გიორგი ქოჩორაშვილის ლევანტეც. მართალია, ამ დროისთვის ეს გუნდი მეექვსე ადგილზეა, თუმცა 1-2 ადგილებზე მყოფ ელჩსა და ოვიედოსთან ჩამორჩენა სულ რაღაც 3 ქულას შეადგენს. როგორც ვხედავთ, სეგუნდა დივიზიონში მართლაც დაძაბული ბრძოლა მიმდინარეობს.
მივადექით იმ ქართველ ლეგიონერებს, რომელთა გუნდები, პარიზელების მსგავსად, თავიანთ ჩემპიონატებში პირველ ადგილზე არიან - გურამ კაშიას სლოვან ბრატისლავა, ოთარ კიტეიშვილის შტურმ გრაცი, გიორგი გოჩოლეიშვილის კოპენჰაგენი და გაბრიელ სიგუას ბაზელი...ეს კლუბები ჩემპიონობის ნომერ პირველი პრეტენდენტები არიან.
პირველ ადგილთან ახლოს ასევე არის გიორგი ქვილითაიას ლიმასოლი (3-ქულიანი ჩამორჩენა პაფოსთან), გიორგი გველესიანის პერსეპოლისი (6-ქულიანი ჩამორჩენა ტრაკტორთან) და ანზორ მექვაბიშვილის ინივერსიტატეა კრაიოვა (3-ქულიანი ჩამორჩენა სტიაუა ბუქარესტთან).
