ალბათ იტყვით, ბოლონიასთან გოლი ასე ძალიან რატომ უნდა უნდოდესო. კვარა თბილისიდან ნეაპოლში რამდენიმე დღის წინ დაბრუნდა და ერთი სული ჰქონდა, ბოლონიასთან ეთამაშა, რათა გოლი გაეტანა და თავისი ახალშობილისთვის მიეძღვნა. წინა დღეებში მისი ფიქრები სწორედ ამაზე იყო. გოლი და აღნიშვნა. ხვიჩამ ეს მისია შეასრულა და მსგავსი რაღაცები მისგან უკვე აღარ გვიკვირს, რადგან როგორც თავად ამბობს, რასაც იწამებ, აუცილებლად ასრულდება.
გატანილი გოლი მან სწორედ პატარა დამიანეს მიუძღვნა. კვარაშოუ დაბრუნდა. მონატრებული ფეხბურთი, რომელსაც კვარაცხელია თამაშობს, დღეს ვიხილეთ. გოლამდე მან საგოლე გადაცემა დი ლორენცოს გაუკეთა. ნაპოლიმ 3:0 მოიგო.
იტალიაში ჩასულ ქართველს ბევრი ზედმეტსახელი შეარქვეს. დღევანდელ შეხვედრაში ამ ზედმეტსახელების თავმოყრა ვიხილეთ. საგოლე გადაცემა დახატა, როგორც კვარავაჯომ, გოლი გაიტანა, როგორც კვარადონამ - წამოიღო და ინდივიდუალური ოსტატობის ხარჯზე ცაციათი შეასრულა.
გოლისა და საგოლე გადაცემის გარდა, კვარამ თავის ფლანგზე ბოლონიას მცველები არ ამოასუნქთა - ბურთის გაძვრენები ფეხებშუა, გამჭოლი გადაცემები, მოპოვებული ჯარიმები, 9.2 შეფასება და მატჩის საუკეთესო ფეხბურთელი.
კონტემ სწორად გათვალა, მატჩისწინა ვარჯიში კვარაცხელიას გამო საღამოს რომ გადაწია. იტალიელ სპეციალისტს თავის ნეაპოლურ კარიერაში პირველი მატჩი სწორედ ქართველმა მოაგებინა.
სეზონი გრძელდება. კვარაცხელია გაჩერებას არ აპირებს. შემდეგი გაჩერება პარმაა. ალბათ, უკვე ახალ მეწყვილესთან, რომელუ ლუკაკუსთან ერთად.
