დღის ყველაზე დრამატული დაპირისპირება გურამ თუშიშვილსა და ტედი რინერს შორის ვიხილეთ. ქართველი ძიუდოისტი ფრანგ ლეგენდას 1/4 ფინალში შეხვდა და იპონით დამარცხდა.
იპონის შემდეგ, თუშიშვილს და რინერს შორის უსიამოვნო ინციდენტი მოხდა, რის გამოც მსაჯებმა ქართველი რეპეშაჟიდან და ხვალინდელი გუნდური შეჯიბრიდან მოხსნეს. უფრო მეტიც, IJF აღნიშნულ ინციდენტს დეტალურად განიხილავს და შესაძლოა, თუშიშვილი მკაცრად დასაჯონ.
ქალთა მძიმე წონაში იასპარეზა სოფიო სომხიშვილმა, რომელმაც პირველ ორთაბრძოლაში გერმანელი რენე ლუხტი დაამარცხა, ხოლო შემდეგ მასპინძელ რომან დიკოსთან დამარცხდა და ასპარეზობას გამოეთიშა.
საკვალიფიკაციო ეტაპი ვერ გადალახეს და შესაბამისად უმედლოდ დარჩნენ ტყვიის მსროლელი ნინო სალუქვაძე, მძლეოსანი ლიკა ხარჩილავა და ბატუტზე მხტომელი ლუბა გოლოვინა.
