2024 წლის პარიზის ოლიმპიადის მესამე დღეს, საქართველოს ღირსებას 3 სპორტსმენი იცავდა — ძიუდოისტები ლაშა შავდათუაშვილი და ეთერ ლიპარტელიანი და მოკრივე ლაშა გურული.
ოლიმპიადის ოქროს, ვერცხლისა და ბრინჯაოს მედალოსანმა, ლაშა შავდათუაშვილმა პარიზში საწყისი ორთაბრძოლა წააგო და კარიერაში პირველად დარჩა ოლიმპიური მედლის გარეშე. 32 წლის ქართველი ძიუდოისტი მასპინძელ გაბას შეხვდა და შიდოებით დამარცხდა.
მედლამდე ერთი ნაბიჯი დააკლდა 57 კგ. წონით კატეგორიაში მოასპარეზე ეთერ ლიპარტელიანს, რომელმაც ასპარეზობა დიდი ბრიტანელი ნაირნეს და უზბეკი ამინოვას ბარიერის დაძლევით დაიწყო. 1/4 ფინალში, 24 წლის ქართველი ოლიმპიურ ჩემპიონ, ბრაზილიელ რაფაელ სილვასთან დამარცხდა და რეპეშაჟში გადაერთო.
დამამშვიდებელი ეტაპის 1/2 ფინალში, ეთერ ლიპარტელიანმა მარტივად მოუგო მონღოლ ლხვაგატოგოს და ბრინჯაოს მედლისთვის ბრძოლის უფლება მოიპოვა, სადაც მასპინძელ სისიკესთან დამარცხდა და ასპარეზობა მე-5 ადგილზე დაასრულა.
დღის ბოლოს კრივის 63,5 კგ. წონით კატეგორიაში პირველი ორთაბრძოლა გამართა ლაშა გურულმა — მისი მეტოქე აზერბაიჯანელი მალიკ ჰასანოვი იყო. 27 წლის ქართველმა მოკრივემ ორთაბრძოლა დამაჯერებლად წარმართა და 1/4-ფინალური ეტაპის საგზური მოიპოვა.
1/4 ფინალში ლაშა გურულის მეტოქე ყაზახ მუხამედსაბირ ბაზარბაიულუსა და ტაიპეელ ლაი ჩუ-ენს შორის გამარჯვებული იქნება. ქართველი მოკრივე ოლიმპიურ თამაშებზე შემდეგ ბრძოლას 1 აგივსტოს გამართავს.
ხვალ, პარიზის ოლიმპიური თამაშების მე-4 დღეს, საქართველოს ნაკრებიდან ორი ძიუდოისტის იასპარეზებს — ტატო გრიგალაშვილი და ეთერ ასკილაშვილი. წინასწარი ორთაბრძოლები 12:00 საათზე დაიწყება, ხოლო ფინალური ბლოკი სტარტს 18:00 საათზე აიღებს.
პარიზი 2024, III დღე — გურულის წარმატებული სტარტი და ძიუდოისტების მორიგი მარცხი
