დასავლეთ კონფერენციის ერთ-ერთი ყველაზე საინტერესო მატჩი ლოს ანჯელესში შედგა - ადგილობრივი კლიპერსი დალას მავერიქს დაუხვდა. ლუკა დონჩიჩის გუნდმა სერიაში ანგარიშის გათანაბრება მოახერხა და მესამე თამაშის წინ კარგი განწყობაც შეიქმნა. ტაბლოზე საბოლოო ანგარიში 93:96 დაფიქსირდა.
დონჩიჩის ანგარიშზე 32 ქულა, 6 მოხსნა და 9 პასი იყო. ლოს ანჯელეს კლიპერსიდან საუკეთესო პოლ ჯორჯი იყო, რომელმაც საკუთარ გუნდს 22 ქულა მოუპოვა.
ეს წყვილი პლეიოფებში ყველაზე საინტერესოდ გამოიყურება. ორივე გუნდში ძალიან მაღალი დონის კალათბურთელებს ვხედავთ, შესაბამისად, წინ უფრო დაძაბული მატჩები გველოდება. სერიის მესამე შეხვედრა დალასში 27 აპრილს, თბილისის დროით 04:00 საათზე გაიმართება.
დასავლეთ კონფერენციის კიდევ ერთი შეხვედრა მინეაპოლისში გაიმართა, სადაც მინესოტა ტიმბერვულვზმა სერიაში უპირატესობა გაზარდა და ფინიქს სანსი უშანსოდ, 105:93 დაამარცხა. მინესოტელთა მხრიდან პარკეტზე საუკეთესო ჯეიდენ მაკდანიელსი იყო - 25 ქულა, 8 მოხსნა და 3 პასი. სტუმარი გუნდიდან კი დევინ ბუკერი გამოირჩეოდა, რომელმაც საკუთარ გუნდს 20 ქულა მოუტანა. ამ წყვილში მინესოტას ასეთ უპირატესობას ბევრი არ ელოდა, საინტერესოა, როგორ გაგრძელდება სერია უკვე ფინიქსში, სადაც სანსი ორ შეხვედრას ჩაატარებს. მომდევნო მატჩი 27 აპრილს, თბილისის დროით 06:30 საათზე გაიმართება.
აღოსავლეთ კონფერენციაში მხოლოდ ერთი მატჩი გაიმართა, სადაც მილუოკი ბაქსი ფისერვ ფორუმ არენაზე ინდიანა პეისერს დაუხვდა და მძიმე ბრძოლაში, 108:125 დამარცხდა. სტუმარმა გუნდმა სერიაში ანგარიშის გათანაბრება მოახერხა.
მატჩის MVP პასკალ სიაკამი გახდა. 30 წლის კამერუნელი როგორც პირველ მატჩში, ახლაც ერთ-ერთი საუკეთესო იყო პარკეტზე - 37 ქულა, 11 მოხსნა და 6 პასი. რაც შეეხება მილუოკი ბაქსის მხრიდან გამორჩეულ კალათბურთელს, დემიან ლილარდმა საკუთარ გუნდს 34 ქულა, 4 მოხსნა და 5 პასი მოუპოვა, თუმცა ეს საკმარისი არ აღმოჩნდა გამარჯვებისთვის. სერიის მესამე შეხვედრა 27 აპრილს, თბილისის დროით 01:30 საათზე გაიმართება.
