აღმოსავლეთ კონფერენციის ჩემპიონმა ბოსტონ სელტიკსმა მაიამი ჰიტი საკუთარ კედლებში მარტივად, 114:94 დაამარცხა და სერიაში დაწინაურდა. ბოლო მეოთხედის გარდა, ჯო მაზულას გუნდი სრულ უპირატესობას ფლობდა და დამსახურებული გამარჯვებაც მოიპოვა. ბოსტონიდან საუკეთესო ჯეისონ ტატუმი იყო - 23 ქულა, 10 მოხსნა და 10 პასი.
მაიამის მხრიდან კი გამორჩეული ბემ ადებაიო იყო. 26 წლის ამერიკელის ანგარიშზე 24 ქულა, 6 მოხსნა და 3 პასი იყო. მეორე მატჩი 25 აპრილს კვლავ ბოსტონში გაიმართება, თბილისის დროით 03:00 საათზე.
აღმოსავლეთ კონფერენციის კიდევ ერთ მატჩი გაიმართა მილუოკში, სადაც ადგილობრივმა ბაქსმა ინდიანა პეისერსი დამაჯერებლად, 109:94 დაამარცხა და სერიაში დაწინაურება მოახერხა. მესამე მეოთხედის გარდა, მილუოკი მთელი მატჩის განმავლობაში დიდ უპირატესობას ფლობდა. შეხვედრის MVP დემიან ლილარდი გახდა, რომელმაც საკუთარ გუნდს 35 ქულა, 6 მოხსნა და 3 პასი მოუტანა. ინდიანადან გამორჩეული კი პასკალ სიაკამი იყო - 36 ქულა, 13 მოხსნა, 2 პასი. მეორე შეხვედრას ისევ ფისერვ ფორუმ არენა უმასპინძლებს, მატჩი 24 აპრილს, თბილისის დროით 04:30 საათზე გაიმართება. ეს წყვილი პლეიოფებში ერთ-ერთი ყველაზე თანაბარია, შესაბამისად, წინ ძალიან საინტერესო მატჩები გველოდება.
რაც შეეხება დასავლეთ კონფერენციას, აქაც ორი მატჩი ვიხილეთ, სადაც ასევე მასპინძელმა გუნდებმა შეძლეს სერიაში დაწინაურება. ერთ-ერთი გამორჩეული წყვილია ლოს ანჯელეს კლიპერსი-დალას მავერიქსი, სადაც პირველ შეხვედრაში გამარჯვება ტაირონ ლუს გუნდმა შეძლო, 109:97. პარკეტზე მაყურებელმა ტოპ კალათბურთი იხილა - ერთმანეთს დაუპირისპირდნენ ისეთი მოთამაშეები როგორიც არიან: პოლ ჯორჯი, ლუკა დონჩიჩი, კაირი ირვინგი, ჯეიმს ჰარდენი, რასელ ვესტბრუკი და სხვა.
საუკეთესო, რა თქმა უნდა, ლუკა დონჩიჩი იყო - 33 ქულა, 13 მოხსნა და 6 პასი, თუმცა ეს სტატისტიკა გამარჯვებისთვის საკმარისი არ აღმოჩნდა. კლიპერსის მხრიდან კარგი მატჩი ჰქონდა ჯეიმს ჰარდენს, რომლის ანგარიშზეც 28 ქულა, 2 მოხსნა და 8 პასი იყო. სერიის მეორე შეხვედრა 24 აპრილს, თბილისის დროით 06:00 საათზე გაიმართება.
გუშინდელი მატჩებიდან ყველაზე დაძაბული ოკლაჰომა სიტის და ნიუ ორლეანს პელიკანსის დაპირისპირება აღმოჩნდა, სადაც გამარჯვება მასპინძელმა გუნდმა მოიპოვა, 94:92. პირველი ორი მეოთხედი გუნდებმა ფრედ დაასრულეს, ოკლაჰომამ კი დაწინაურება მესამე მეოთხედში შეძლო, რა დროსაც შაი გილგეუს-ალექსანდერმა საკუთარ გუნდს ულიდერა და მნიშვნელოვანი ბურთები ჩააგდო. პელიკანსს ბოლო მეოთხედი კარგი ჰქონდა, თუმცა გამარჯვება მაინც ოკლაჰომას დარჩა.
MVP გილგეუს-ალექსანდერმა გახდა - 28 ქულა, 6 მოხსნა და 4 პასი. პელიკანსიდან გამორჩეული მოთამაშე ტრეი მერფი იყო, რომელმაც საკუთარ გუნდს 21 ქულა მოუტანა. სერიის მეორე მატჩი 25 აპრილს, თბილისის დროით 05:30 საათზე გაიმართება.
