ევროპის ჩემპიონატი ჩვენი ნაკრებისთვის დასრულდა. ხვიჩა კვარაცხელიამ, ნაკრებთან ერთად, წარმატებულად იასპარეზა. მან ერთი გოლი გაიტანა და ჩემპიონატის საუკეთესო დრიბლიორებს შორისაა.
დადებითმა ემოციებმა ჩაიარა, ახლა კი საკლუბო კარიერაზე ფიქრის დრო დადგა. ამ საკითხთან მიმართებით კვარაცხელიას გარშემო დიდი მითქმა-მოთქმაა.
მის ტრანსფერზე ბოლო ცნობები ასეთი იყო - პსჟ ქართველის სანაცვლოდ 100 მილიონზე მეტს იხდიდა, პირადი კონტრაქტიც შეათანხმა, თუმცა ნაპოლის პრეზიდენტს და ახალ მთავარ მწვრთნელს, ანტონიო კონტეს კვარას დატოვება და მის გარშემო გუნდის აწყობა სურთ.
მხარეებს შორის შეხვედრები იყო ევროპის ჩემპიონატამდე და ჩემპიონატის მიმდინარეობისასაც. კვარას მხარეს კარიერაში ახალი ნაბიჯის გადადგმა და სხვა გუნდში გადასვლა უნდოდა, ნაპოლის კი - მისი შენარჩუნება.
თუ აქამდე ხვიჩას წასვლის საკითხი 50-50-ზე იყო, ახლა იმის თქმა შეგვიძლია, რომ ნაპოლის თავისი გააქვს და ყველაფერი იქითკენ მიდის, რომ კვარაცხელია ახალ სეზონშიც ნაპოლიში იქნება.
ნაპოლის რომ თავისი გააქვს, ლოგიკურია, რადგან სერია ა-ს საუკეთესო ფეხბურთელს გუნდთან კონტრაქტი აკავშირებს და კლუბის დაქვემდებარების ქვეშაა.
