ფეხბურთელები, რომლებსაც ნაპოლიდან წასვლა დააგვიანდათ
მარეკ ჰამშიკი - ლეგენდარული კაპიტანი, რომელმაც ნაპოლის, პრაქტიკულად, მთელი თავისი კარიერა შესწირა. ის ამ გუნდში 19 წლის ასაკში მოვიდა და 31 წლამდე დარჩა. სლოვაკი გამთამაშებლით არაერთხელ ინტერესდებოდნენ პრემიერ ლიგის გრანდები, განსაკუთრებით კი მანჩესტერ იუნაიტედი და ლონდონის ჩელსი.
"პარტენოპეის" კაპიტნის სანაცვლოდ ჩამოდიოდნენ 40 მილიონ ევროს, თუმცა კლუბის პრეზიდენტი, აურელიო დე ლაურენტისი თითქმის ორჯერ უფრო მეტს ითხოვდა. ასაკის მატებასთან ერთად, "აძურის" მე-17 ნომრის თამაშის ხარისხი დაეცა, გრანდების ინტერესი გაქრა, რის შედეგადაც მან მიაშურა ჯერ ჩინეთს, შემდეგ კი შვედეთსა და თურქეთს.
ხოსე კალეხონი - ის არ გამოადგა მადრიდის რეალს, თუმცა "ლურჯებს" შვიდი წლის განმავლობაში ერთგულად ემსახურა. ფორმის პიკში მყოფი გარემარბით ინტერესდებოდნენ "არისტოკრატები" და პრიმერა დივიზიონის წარმომადგენლები, მაგრამ 25-მილიონიანმა შემოთავაზებებმა იტალიელი ბიზნესმენის მადა ვერ დააკმაყოფილა. შედეგად: ესპანელმა ვინგერმა მარადონა 33 წლის ასაკში დატოვა და ფლორენციის ფიორენტინას მიაშურა.
ლორენცო ინსინიე - თავისი თაობის ერთ-ერთი ყველაზე ნიჭიერი წარმომადგენელი და ტექნიკური იტალიელი შემტევების ტრადიციის გამგრძელებელი. "სკუადრა აძურას" ვინგერის სახელს უკავშირებდნენ მიუნხენის ბაიერნს, ლივერპულსა და ბარსელონას, მაგრამ ნაპოლის პრეზიდენტის მიერ მოთხოვნილი 75 მილიონი არავინ გადაიხადა. "პარტენოპეის" შემტევმა კლუბი 31 წლის ასაკში დატოვა და კანადას მიაშურა.
კალიდუ კულიბალი - "აძურიში" ყოფნის პერიოდში ის ჩამოყალიბდა მსოფლიოს ერთ-ერთ საუკეთესო ცენტრალურ მცველად, რომელსაც მსურველების რიგი ედგა. მართალია, სენეგალელი უკანახაზელი მაინც სტემფორდზე გადავიდა, მაგრამ უკვე 30 წლის ასაკში და როგორც დრომ აჩვენა, მისი საუკეთესო შესრულება და თამაში "ლურჯებში" იყო დარჩენილი.
დრის მერტენსი - გარემარბად მოსული ფეხბურთელი, რომელიც დროთა განმავლობაში გახდა ცენტრალური თავდამსხმელი და დიეგო მარადონას ბინადრების მთავარი მეგოლე. ბელგიელი ფორვარდით ინტერესდებოდნენ მილანის ინტერი და პრემიერ ლიგის გრანდები, მაგრამ 30 მილიონზე მეტი მის სანაცვლოდ არავინ გადაიხადა. დე ლაურენტისმა თავისი კლუბის შემტევი 35 წლამდე შეაყოვნა, შემდეგ კი თურქეთში გაუშვა.
ფეხბურთელები, რომლებმაც ნაპოლი დროულად დატოვეს
ედინსონ კავანი - იტალიელმა ბიზნესმენმა მის სანაცვლოდ 65 მილიონი ევრო მოითხოვა, თანხა, რომელიც მხოლოდ პსჟ-მ გაიმეტა. ის გახდა ფრანგული კლუბის ისტორიაში ერთ-ერთი საუკეთესო მოთამაშე, რომელიც გატანილი ბურთების მაჩვენებლით ზლატან იბრაჰიმოვიჩზე მაღლაც კი დადგა. ურუგვაელ ფორვარდზე მეტი პარიზში მხოლოდ კილიან მბაპეს აქვს გატანილი.
ნაპოლის ყოფილმა თავდამსხმელმა "ლურჯ-წითლებში" მოიპოვა ლიგა 1-ის ექვსი ტიტული და არაერთი ინდივიდუალური ჯილდო. მან ასევე ჩემპიონთა ლიგის ფინალსაც მიაღწია. "პარტენოპეის" დატოვების მომენტისთვის "მატადორი" იყო 26 წლის. პარკ დე პრენსის გარდა, მის კარიერაში ფიგურირებს მანჩესტერ იუნაიტედი, ვალენსია და ბოკა ხუნიორსი.
გონსალო იგუაინი - აურელიომ მის სანაცვლოდ 90 მილიონი ევრო მოითხოვა და აღნიშნული თანხა ტურინის იუვენტუსმა გადაიხადა, რითაც საფეხბურთო სამყარო შოკში ჩააგდო. გაამართლა თუ არა არგენტინელმა ფორვარდმა "ბებერ ქალბატონში" სხვა საკითხია, მაგრამ ფაქტია, "აძურის" დატოვების შემდეგ, მან ხელი გამოჰკრა 3 სკუდეტოსა და ჩემპიონთა ლიგის ფინალს.
ჟორჟინიო ფრელო - ის იშვიათი შემთხვევა, როდესაც იტალიის ნაკრების ფეხბურთელი პრემიერ ლიგაში დიდხანს გაჩერდა. ის მაურიციო სარის გაჰყვა ჩელსიში, "ლურჯების" ბიუჯეტი კი 57 მილიონით შეივსო. "სკუადრა აძურას" ჩამშლელმა ახალ გუნდში მოიგო ჩემპიონთა ლიგა, ევროპა ლიგა, უეფას სუპერთასი და მსოფლიო საკლუბო მუნდიალი.
დიეგო მარადონას ბინადრების ყოფილი საყრდენი ნახევარმცველი ახლა ლონდონის არსენალში თამაშობს და ამ გუნდთან ერთად პრემიერ ლიგის ჩემპიონობისთვის იბრძვის. ცნობისთვის, "მეთოფეებმა" თავიანთ მე-20 ნომერს მოქმედი ხელშეკრულება 2025 წლამდე გაუხანგრძლივეს. როგორც ვხედავთ, 32 წლის ჩამშლელის კარიერაში დასრულებული ჯერ არაფერია.
კიმ მინ ჯე - მართალია, "რეკორდმაისტერში" ის არ არის ისეთი ეფექტური, როგორიც სერია ა-ში იყო, თუმცა ფაქტია, ნაპოლის პრეზიდენტის ოქროს გალიას მან თავი წარმატებით დააღწია. "პარტენოპეიმ" კორეელი უკანახაზელის სანაცვლოდ 50 მილიონი მიიღო. ბავარიული კლუბიდან წასვლის შემთხვევაშიც კი, "აძურის" ყოფილი უკანახაზელისთვის არაფერია დასრულებული, ის ჯერ 27 წლის არის.
ეზეკილ ლავეცი - დე ლაურენტისის მიერ კიდევ ერთი ძვირად შეფასებული ფეხბურთელი, რომლის სანაცვლოდ ფული ისევ და ისევ ნასერ ალ-ხელაიფიმ გაიმეტა. "ლურჯებმა" არგენტინელი ვინგერის სანაცვლოდ 30 მილიონი მიიღეს, თავად მოთამაშე კი პერიოდულად ხდებოდა ლიგა 1-ის ჩემპიონი და ევროსარბიელზე ტოპ მატჩების მონაწილე.
