მატჩის დღე: სასკუდეტო დუელი, ამჯერად უკვე კვარაცხელიას გარეშე

შაბათის მატჩის დღე არაერთ საინტერესო დაპირისპირებას გვიმზადებს. ყველაზე საინტერესო მოხდება სერია ა-ში, თუმცა ყველაფრის შესახებ დაწვრილებით.

პრემიერ ლიგა

პრემიერ ლიგაში სატურნირო ცხრილის ლიდერი ლივერპული ბრენტფორდს ესტუმრება. ასევე გამოსარჩევია არსენალისა და ასტონ ვილას შეხვედრა. "წითლების" უახლოესი მდევარი არის სწორედ ლონდონური გუნდი, რომელთანაც სხვაობა ამ დროისთვის 4 ქულას შეადგენს. აღსანიშნავია ისიც, რომ მერსისაიდელებს 1 მატჩით ნაკლები აქვთ ჩატარებული.

16:30 - ნიუკასლი-ბორნმუთი

19:00 - ბრენტფორდი-ლივერპული

19:00 - ლესტერი-ფულჰემი

19:00 - ვესტ ჰემი-კრისტალ პალასი

21:30 - არსენალი-ასტონ ვილა

ლა ლიგა

ლა ლიგაში დღეს ვიხილავთ ჩემპიონობისთვის მებრძოლი ორი გუნდის დაპირისპირებას - ბარსელონა ესტუმრება ხეტაფეს, ატლეტიკო კი ლეგანესს. სატურნირო ცხრილის ლიდერი ამ დროისთვის არის მადრიდული კლუბი, შემდეგ კი მოდის თანაქალაქელი რეალი და "ბლაუგრანა".

17:00 - ჟირონა-სევილია

19:15 - ლეგანესი-ატლეტიკო

21:30 - ბეტისი-ალავესი

23:55 - ხეტაფე-ბარსელონა

სერია ა

სერია ა-ში გველის ორი ტოპ შეხვედრა: ტურინის იუვენტუსი - მილანი და ბერგამოს ატალანტა ნაპოლი. სერჟიო კონსეისაუს კიდევ ერთი რთული გამოცდა, მაგრამ ერთხელ უკვე ჩაბარებული. შეგახსენებთ, რომ იტალიის სუპერთასის 1/2 ფინალში "როსონერიმ" სწორედ "ბებერ ქალბატონს" მოუგო.

ორივე გუნდი ამ დროისთვის არის ოთხეულს მიღმა და გამარჯვების მოპოვება ჩემპიონთა ლიგის ზონაში შესვლისთვის უმნიშვნელოვანესი წინგადადგმული ნაბიჯი იქნება. "ბიანკონერი" 34 ქულით მე-5 პოზიციაზეა, "შავ-წითლები" კი 31 ქულით მე-7 ადგილზე არიან.

რაც შეეხება სასკუდეტო დუელს - პირველ ადგილზე არის "პარტენოპეი", მესამეზე კი "ლა დეა". სხვაობა ამ ორ გუნდს შორის ოთხი ქულაა. ჩემპიონობისთვის ბრძოლა ჩაივლის ხვიჩა კვარაცხელიას გარეშე, რომელიც ცოტა ხნის წინ, პარის სენ-ჟერმენის მოთამაშე ოფიციალურად გახდა. ვნახოთ, რას იზამენ "ლურჯები" ქართველი ვინგერის გარეშე.

18:00 - ბოლონია-მონცა

21:00 - იუვენტუსი-მილანი

23:45 - ატალანტა-ნაპოლი

ბუნდესლიგა

ბუნდესლიგაში პირველ რიგში გვაინტერესებს ბუდუ ზივზივაძის ჰაიდენჰაიმი, რომელიც სანქტ პაულის მიიღებს. მისმა ახალმა გუნდმა უკვე მოახერხა გასავარდნი ზონიდან თავის დაღწევა და ახლა "როთბლაუსი" არის მე-15 პოზიციაზე, სწორედ "მეკობრეების" მეზობლად. ვნახოთ, შეძლებს თუ არა ქართველი ფორვარდი ბუნდესლიგაში დღეს პირველი ბურთის გატანას.

18:30 - ბაიერნი-ვოლფსბურგი

18:30 - შტუტგარტი-ფრაიბურგი

18:30 - ბოხუმი-ლაიფციგი

18:30 - კილი-ჰოფენჰაიმი

18:30 - ჰაიდენჰაიმი-სანქტ პაული

21:30 - ლევერკუზენი-გლადბახი

ლიგა 1

ლიგა 1-ში გიორგი მიქაუტაძის ლიონი საკუთარ კედლებში ტულუზას მიიღებს. შეგახსენებთ, რომ ახალგაზრდა თავდამსხმელმა შუა კვირაში მოასწრო კიდევ ერთი ბურთის გატანა, ამჯერად საფრანგეთის თასზე. დღეს ასევე პარის სენ-ჟერმენი ესტუმრება ლანსს, მაგრამ ჯერჯერობით კვარას გარეშე. ქართველი ვინგერის დებიუტი შედგება ერთ კვირაში, რეიმსთან.

20:00 - ლანსი-პსჟ

22:00 - რენი-ბრესტი

23:55 - ლიონი-ტულუზა

ლეგიონერები

საინტერესო დაპირისპირებები გველის სერია ბ-ში - ლუკა ლოჩოშვილის სალერნიტანა მიიღებს რეჯანას, გიორგი კვერნაძის ფროზინონე კი მოდენას ესტუმრება. არ უნდა დაგვავიწყდეს ჩემპიონშიპი, სადაც გიორგი ჩაკვეტაძის უოტფორდი დერბის ესტუმრება. მთავარი მატჩი კი გაიმართება ლა ლიგა 2-ში: გიორგი ქოჩორაშვილის ლევანტე გიორგი წიტაიშვილის გრანადას წინააღმდეგ.

18:00 - სალერნიტანა-რეჯანა

18:00 - მოდენა-ფროზინონე