პრემიერ ლიგა
ტურის ცენტრალური შეხვედრა ლონდონში გაიმართება: ჩელსი - არსენალი. რიგით 190-ე დედაქალაქური დერბი, რომელშიც 79-ჯერ გამარჯვებულები გამოვიდნენ "მეთოფეები", 57-ჯერ - "არისტოკრატები", 53 მატჩი კი ფრედ დასრულდა. აღნიშნულ თამაშს ინტრიგას მატებს ის ფაქტიც, რომ ორივე კლუბი სატურნირო ცხრილში მეზობლად არიან განლაგებულნი.
18-18 ქულა და 5-6 ადგილები. ორივე გუნდი დერბის სხვადასხვა განწყობით ხვდება - "კანონირები" ჩემპიონთა ლიგაზე დამარცხდნენ ინტერნაციონალესთან, "ლურჯებმა" კი კონფერენს ლიგაზე არმავირის ნოა 8:0 გაანადგურეს. რთულია იმის თქმა, თუ ვინ არის ფავორიტი: თუ "განერები" ბოლო პერიოდში ასოცირდებიან კრიზისსა და ჩავარდნასთან, "პენსიონერები" თითქოს აღმავლობის გზაზე არიან.
არ ღირს იმაზე საუბარი, თუ რომელ გუნდს შეუძლია საჩემპიონო რბოლაში ჩაბმა - ობიექტურად, მიკელ არტეტას გუნდი, ისევე როგორც სტემფორდ ბრიჯის ბინადრები, დღეს 4-ეულში განკუთვნილი ადგილისთვის მებრძოლი კლუბები არიან. დედაქალაქური დერბის გარდა, დღეს, მანჩესტერ იუნაიტედი ლესტერს მიიღებს.
18:00 - მანჩესტერ იუნაიტედი-ლესტერი
18:00 - ტოტენჰემი-იფსვიჩი
20:30 - ჩელსი-არსენალი
ლა ლიგა
ლა ლიგაში ყველაზე საინტერესო შეხვედრა ტურის ბოლოს გაიმართება - ბარსელონა სან სებასტიანის რეალ სოსიედადს ესტუმრება. შეგახსენებთ, რომ პრიმერა დივიზიონის ლიდერი არის სწორედ "ბლაუგრანა", რომელიც უახლოეს მდევარს, მადრიდის რეალს, ამ მომენტისთვის 6 ქულით უსწრებს. როგორც ვიცით, სწორედ ბასკები ითვლებიან კატალონიელთა ერთ-ერთ ყველაზე უხერხულ მეტოქედ ლა ლიგაში.
17:00 - ბეტისი-სელტა
19:15 - მალიორკა-ატლეტიკო
21:30 - ვალიადოლიდი-ბილბაო
21:30 - ხეტაფე-ჟირონა
23:55 - სოსიედადი-ბარსელონა
სერია ა
ბევრის აზრით, ნაადრევი საჩემპიონო დუელს ვიხილავთ: ინტერნაციონალე - ნაპოლის დაპირისპირებით. სერია ა-ს ლიდერები ამ დროისთვის 25 ქულით არიან სწორედ სტუმრები, რომლებიც მილანელ მასპინძლებს 1 ქულით უსწრებენ. მატჩს დამატებით ინტრიგას სძენს ანტონიო კონტესა და რომელუ ლუკაკუს "პარტენოპეიში" ყოფნის ფაქტორი.
შეგახსენებთ, რომ რამდენიმე წლის წინ, იტალიელი მწვრთნელი "ნერაძურისთან" ერთად გახდა სერია ა-ს ჩემპიონი, ბელგიელი თავდამსხმელი კი მისი ერთ-ერთი მთავარი იარაღი იყო. "გველებში" გატარებული წარმატებული ორი სეზონის შემდეგ, სამხრეთელთა ამჟამინდელმა სპეციალისტმა კლუბი დატოვა. დღეს, 55 წლის ტაქტიკოსი მეაცაზე მეტოქის რანგში ბრუნდება.
საჩემპიონო სეზონის შემდეგ, ინტერნაციონალე დატოვა "აძურის" ამჟამინდელმა თავდამსხმელმაც, რომელმაც ჩელსის 113 მილიონი ევროს სანაცვლოდ მიაშურა. ლონდონში დამკვიდრების კიდევ ერთი წარუმატებელი მცდელობის შემდეგ, ბელგიის ეროვნული გუნდის მე-10 ნომერი მილანურ კლუბში იჯარით დაბრუნდა.
"ნერაძურიმ" არ გამოისყიდა "ბიგ რომი", რის შედეგადაც ის მთელი ძალებით ცდილობდა გადასვლას ტურინის იუვენტუსში, თუმცა საბოლოოდ რომაში აღმოჩნდა, დღეს კი უკვე მარადონაზეა. "გველების" ქომაგებს არაფერი აქვთ კონტეს საწინააღმდეგო, მაგრამ 31 წლის ფორვარდს ნამდვილად "განსაკუთრებულ" დახვედრას მოუწყობენ.
იტალიელი მწვრთნელის გუნდის სასტარტო შემადგენლობაში იქნება ხვიჩა კვარაცხელია, რომელმაც შესაძლოა თავდამსხმელის პოზიციაზე ითამაშოს. ეს მოხდება იმ შემთხვევაში, თუ ანტონიო გამოიყენებს 3-5-2-ს, სქემას, რომელსაც 2 ფორვარდი აგვირგვინებს. ლუკაკუს სწორედ ქართველი შემტევი შეუწყვილდება.
საინტერესოა, რომ ნაპოლის ლიდერს ჯუზეპე მეაცას ბინადრების წინააღმდეგ გოლი ჯერ არ გაუტანია. საერთო ჯამში მან ითამაშა ხუთი შეხვედრა, მაგრამ უშედეგოდ. ვნახოთ, როგორი იქნება 23 წლის ვინგერის მე-6 მცდელობა. დღეს, თავის მატჩს ჩაატარებს "ჯალოროსიც", რომელიც ახალი დამრიგებლის ძიებაშია.
15:30 - ატალანტა-უდინეზე
18:00 - რომა-ბოლონია
18:00 - ფიორენტინა-ვერონა
21:00 - მონცა-ლაციო
23:45 - ინტერი-ნაპოლი
ლიგა 1
ლიგა 1-ის ტურის მშვენება - რონული დერბი ლიონისა და სენტ-ეტიენის მონაწილეობით. გიორგი მიქაუტაძე ზურიკო დავითაშვილის წინააღმდეგ. ქართველი შემტევები თავიანთ კლუბებს განსხვავებულად შეეგუენ: ოლიმპიკის ფორვარდს 9-მატჩიანი მშრალი სერია ჰქონდა, რის შემდეგაც მან ნავსი ოსერთან 2 ბურთით გატეხა.
"მწვანეების" გარემარბმა კი უკვე ხუთი გოლისა და ორი საგოლე გადაცემის გაფორმება მოასწრო. როგორც გვახსოვს, "თეთრებმა" იზარალეს მისგანაც - ჰეთ-თრიკი საფრანგეთის ჩემპიონატის მე-5 ტურში. კითხვებს არ იწვევს ის ფაქტი, რომ "ლეს ვერტსის" 22-ე ნომერი ძირითად შემადგენლობაში იქნება, რასაც ვერ ვიტყვით "ლეს გონსის" 69-ე ნომერზე.
დიახ, საკმაოდ მაღალია იმის ალბათობა, რომ "ლომების" სასტარტოში ადგილს დაიკავებს ალექსანდერ ლაკაზეტი და არა 24 წლის თავდამსხმელი. მიქაუტაძე რონულ დერბიში სათადარიგოთა სკამზეც კი იქნება მოტივირებული, რადგან ის სისხლით და ხორცით ლიონს ეკუთვნის. შეგახსენებთ, რომ ქართველ ფორვარდს "წმინდანების" კარის აღების გამოცდილება უკვე აქვს.
ეს მოხდა ლიგა 2-ში, როდესაც ჟორჟი მეცში თამაშობდა. მისი გოლის აღნიშნვა იმდენად ემოციური და დასამახსოვრებელი იყო, რომ შეხვედრა რამდენიმე წუთით შეწყდა კიდეც. იმედი დავიტოვოთ, რომ ოლიმპიკის ფორვარდს თავის გამოჩენის შანსი დღესაც ექნება.
18:00 - ნიცა-ლილი
20:00 - მონპელიე-ბრესტი
20:00 - რენი-ტულუზა
20:00 - ლე ავრი-რეიმსი
23:45 - ლიონი-სენტ ეტიენი
ლეგიონერები
კვარაცხელიას, მიქაუტაძისა და დავითაშვილის გარდა, თავიანთ შეხვედრების სხვა ლეგიონერებიც ჩაატარებენ. ბუდუ ზივზივაძის კარლსრუე მეორე ბუნდესლიგაში მიუნსტერს მიიღებს. დღეს ასევე, მოედანზე გამოვლენ ლევან შენგელია, ლაშა დვალი, გიორგი გოჩოლეიშვილი და სხვები.
მატჩების სრული განრიგი შეგიძლიათ იხილოთ ქვემოთ:
16:30 - კარლსრუე-მიუნსტერი
18:00 - მანჩესტერ იუნაიტედი-ლესტერი
18:00 - რომა-ბოლონია
18:00 - ტოტენჰემი-იფსვიჩი
19:15 - მალიორკა-ატლეტიკო
20:30 - ჩელსი-არსენალი
21:00 - ორჰუსი-კოპენჰაგენი
21:00 - აპოელი-აელი
23:45 - ინტერი-ნაპოლი
23:45 - ლიონი-სენტ ეტიენი
23:55 - სოსიედადი-ბარსელონა
