მილანის ყოფილმა მცველმა, კახა კალაძემ სერია ა-ს ოფიციალურ იუთუბ არხს ინტერვიუ მისცა, რომელშიც მან თავისი განვლილი კარიერა გაიხსენა. ყოფილმა ქართველმა უკანახაზელმა გაიხსენა პაოლო მალდინის გვერდით თამაში, "როსონერიში" გადასვლის მომენტი და ამ გუნდთან ერთად ტიტულების მოგება. "შავ-წითლების" ყოფილმა მცველმა ასევე ხვიჩა კვარაცხელიას შესახებაც ისაუბრა.
"დავიბადე სამტრედიაში და პირველი ნაბიჯები ფეხბურთში სწორედ იქ გადავდგი. ვერასდროს წარმოვიდგენდი, რომ როდესმე მილანში ვითამაშებდი. ძალიან პატარა ვიყავი, როდესაც სამტრედიის აკადემიის მწვრთნელმა მითხრა, რომ ფეხბურთს ვერასდროს ვითამაშებდი. მისმა სიტყვებმა ჩემი მოტივაცია გააორმაგა.
"როსონერიში" გავატარე ცხრა დაუვიწყარი წელი და ამ გუნდთან ერთად მოვიგე ყველაფერი, რისი მოგებაც კი შესაძლებელი იყო. ბედნიერი ვარ, რომ ამხელა ისტორიისა და ტრადიციების მქონე კლუბის ნაწილი ვიყავი. ჩვენ ვიყავით დიდი ოჯახი, ეს ანჩელოტის დამსახურება იყო. ის მართლაც დიდებული სპეციალისტია.
რაც შეეხება მალდინის, ის ჩემი კერპი იყო და მისი სურათები ოთახში მქონდა გაკრული. გავიდა დრო და საფეხბურთო მოედანზე ჩემი საყვარელი მოთამაშის გვერდით მოვხვდი. პაოლო არის არაჩვეულებრივი პიროვნება, ნამდვილი კაპიტანი და ფეხბურთელი, რომელსაც გამარჯვებულის მენტალიტეტი ჰქონდა.
რაც შეეხება კვარაცხელიას, მასთან ხშირად ვკონტაქტობ, მამამისი ბადრი კი ჩემი ახლო მეგობარია. სანამ ნაპოლი მასთან გააფორმებდა კონტრაქტს, ისინი მე მესაუბრნენ. "პარტენოპეის" ავუხსენი, თუ რამდენად კარგ მოთამაშეს იმატებდნენ ხვიჩას სახით. მან ითამაშა იმდენად კარგად, რომ ისინი დღემდე ჩემი მადლიერები არიან", - განაცხადა 46 წლის ყოფილმა მცველმა.
