უნგრეთის გრან პრიზე მეორე პოზიცია პიასტრის ბრიტანელმა თანაგუნდელმა, ლანდო ნორისმა დაიკავა, ხოლო მესამე ადგილზე ლუის ჰემილტონი გავიდა.
რბოლას დაძაბულობის გარეშე არ ჩაუვლია და ბოლო წრეებზე არაერთი დრამატული მომენტი ვიხილეთ. მთავარი ეპიზოდი კი მაკლარენში განვითარებული დრამა იყო — რბოლის მიწურულს, ნორისს პიასტის გატარება მოსთხოვეს, რადგან არასწორად დაგეგმილი პიტ სტოპის გამო სტარტზე მოპოვებული პირველობა დაკარგული ჰქონდა, თუმცა, ბრიტანელი პილოტი უარზე იყო და მხოლოდ ბოლოს დაუჯერა გუნდის მოწოდებას.
მძიმე რბოლა გამოდგა მოქმედი მსოფლიო ჩემპიონისთვის, მაქს ვერსტაპენისთვის, რომელმაც სტარტი მესამე პოზიციიდან აიღო და საბოლოოდ მე-5 ადგილზე გავიდა. ნიდერლანდელ პილოტს გუნდმა პიტ სტოპები არასწორად დაუგეგმა, ხოლო ბოლოს მესამე ადგილისთვის ბრძოლის დროს ჰემილტონს დაეჯახა და საბოლოოდ, პოდიუმის გარეშე დარჩა.
ოსკარ პიასტრიმ კი კარიერაში პირველად მოიგო ფორმულა 1-ის გრან პრი და ისტორიაში 115-ე პილოტი გახდა, რომელმაც რბოლის მოგება მოახერხა. ფორმულა 1-ის მომდევნო რბოლა 28 ივლისს ბელგიაში, ლეგენდარულ სპას ავტოდრომზე გაიმართება.
