გრან პრი ტრადიციულად პარასკევის ვარჯიშებით დაიწყო, რასაც სპრინტის კვალიფიკაცია მოჰყვა. შაბათს სპრინტის რბოლა და კვალიფიკაცია ჩატარდა, ხოლო კვირას მრბოლელებმა ქულები რბოლაში გადაინაწილეს.
ლუის ჰამილტონის გამარჯვება სპრინტზე
სპრინტის კვალიფიკაცია ფერარის 7-გზის ჩემპიონმა, ლუის ჰამილტონმა მოიგო და იტალიური გუნდის ბოლიდით პირველად მოიპოვა პოულ პოზიცია. 40 წლის ბრიტანელმა უსწრაფესი წრე 1:30.849 წუთში გაიარა და მეორე ადგილზე გასულ მაქს ვერსტაპენს 0,018 წამით აჯობა.
კვალიფიკაციაზე მოპოვებული პირველი ადგილი ჰამილტონმა რბოლის სტარტზე წარმატებით შეინარჩუნა და ფინიშის ხაზიც პირველმა გადაკვეთა, რის გამოც 8 ქულა დაიმსახურა. სპრინტზე მთავარი ბრძოლა ვერსტაპენს და პიასტრის შორის შედგა — ავსტრალიელმა პილოტმა მოქმედ მსოფლიო ჩემპიონს სტარტიდან მალევე გადაასწრო და მეორე ადგილზე გავიდა.
ფერარის ჩაგდებული კვალიფიკაცია
ჰამილტონის მიერ მოგებული სპრინტის შემდეგ, ფერარი კვალიფიკაციაზეც ფავორიტებში მოიაზრებოდა და მოლოდინი გაჩნდა, რომ იტალიური გუნდის პილოტები პოულისთვის იბრძოლებდნენ. საბოლოოდ, წითლები კვალიფიკაცია ჩააგდეს და სასტარტო გრიდზე მხოლოდ მე-5 და მე-6 ადგილები დაიკავეს.
ჩინეთის გრან პრის კვალიფიკაციაზე კი საუკეთესო ოსკარ პიასტრი იყო, რომელმაც უსწრაფესი წრე 1:30.641 წუთში გაიარა და კარიერაში პირველად მოიპოვა პოულ პოზიცია. ყველასთვის მოულოდნელად, მეორე ადგილი მერსედესმა და მისმა პილოტმა, ჯორჯ რასელმა დაიკავა, რომელიც ლიდერს მხოლოდ 0,082 წამით ჩამორჩა.
მაკლარენის სრული დომინაცია რბოლაზე
კვალიფიკაციაზე მოპოვებული პირველი და მესამე ადგილის შემდეგ, ნათელი გახდა, რომ მაკალრენმა შანხაი საერთაშორისო ავტოდრომზე ტემპი იპოვა და რბოლაში მთავარი ფავორიტი იქნებოდა. ბრიტანულ გუნდს სტარტიც იდეალური გამოუვიდა — პიასტრიმ ლიდერობა შეინარჩუნა, ხოლო ნორისმა რასელი ჩამოიტოვა და მაკლარენი სათავეში ჩაუდგა პელეტონს.
ხისტი სტარტი აიღო ფერარიმ და პირველივე მოსახვევში ორ ბოლიდს შორის მცირე კონტაქტიც მოხდა, რამაც ლეკლერის წინა ფრთა დააზიანა, თუმცა, მონეგასკმა ბოლომდე შეძლო რბოლის დასრულება. ვერსტაპენმა სტარტზე ორივე ფერარისთან დაკარგა პოზიციები, მაგრამ რბოლის ბოლოს შეცდომა გამოასწორა და საბოლოოდ, ჩინეთის გრან პრიზე მე-4 პოზიცია დაიკავა.
ცალკე აღნიშვნის ღირსია ჰაასი, რომელმაც საოცარი რბოლა ჩაატარა და ორივე პილოტი ათეულში მოხვდა. ოლივერ ბირმანმა სტარტი მე-17 ადგილიდან აიღო და მე-8 პოზიცია დაიკავა, ხოლო ესტებან ოკონი მე-11 ადგილიდან მეხუთეზე გავიდა. ჩინეთის გრან პრიზე კი დუბლი მაკლარენმა გაიფორმა, ხოლო პოდიუმზე მესამე პოზიციით ჯორჯ რასელი ავიდა.
ტექნიკური შემოწმება და ფერარის ორმაგი დისკვალიფიკაცია
ჩინეთის გრან პრის დასრულების შემდეგ, FIA-მ ტრადიციულად რუტინული შემოწმება ჩაატარა და ბოლიდები შეისწავლა, რის გამოც სამი მრბოლელი დისკვალიფიკაციით დასაჯა და რბოლის შედეგები გაუუქმა. აღნიშნულ სიაში პიერ გასლი და ფერარის ორივე პილოტი, შარლ ლეკლერი და ლუის ჰამილტონი მოხვდნენ.
გასლის და ლეკლერის ბოლიდებმა რბოლის შემდეგ დასაშვები მინიმალური წონის მოთხოვნა ვერ დააკმაყოფილეს, ხოლო ჰამილტონის ბოლიდის ძირის უკანა ნაწილი უფრო მეტად გაცვდა, ვიდრე რეგლამენტით არის გათვალისწინებული. აღნიშნული დარღვევების გამო, FIA-მ სამივე პილოტი უმკაცრესად დასაჯა და რბოლის შედეგები გაუუქმა.
ლიამ ლოუსონი — რედ ბულის თავის ტკივილი
2025 წლის სეზონი რედ ბულისთვის დიდი პრობლემებით დაიწყო — მიუხედავად იმისა, რომ მაქს ვერსტაპენი ახერხებს მოწინავე პოზიციებისთვის ბრძოლას, რადიკალურად განსხვავებულ შედეგებს დებს მეორე პილოტი, ლიამ ლოუსონი.
23 წლის ახალ ზელანდიელმა ავსტრიულ გუნდში სერხიო პერესი ჩაანაცვლა, რომელიც გუნდმა 2024 წლის სეზონის დასრულების შემდეგ დაითხოვა. ლოუსონისთვის კი 2025 წელი კატასტროფულად დაიწყო და ზედიზედ მეორედ ვერ მოახერხა კვალიფიკაციის პირველი სეგმენტის გადალახვა. ავსტრალიაში მან სტარტი მე-18, ხოლო ჩინეთში მე-20 პოზიციიდან აიღო და ვერც რბოლაში მოახერხა ათეულში შესვლა.
ინსაიდერული წყაროები უკვე ალაპარაკდნენ ლიამ ლოუსონის მომავალზე და დიდი ალბათობით, მომდევნო, იაპონიის გრან პრი მისთვის გადამწყვეტი იქნება — თუ სასურველი შედეგი ვერ დააფიქსირა, რედ ბულს დატოვებს. ლოუსონის ადგილზე კი იუკი ცუნოდა მოიაზრება, რომელიც რეისინგ ბულსში საკმაოდ კარგად გამოიყურება.
ინსაიდერული წყაროები უკვე ალაპარაკდნენ ლიამ ლოუსონის მომავალზე და დიდი ალბათობით, მომდევნო, იაპონიის გრან პრი მისთვის გადამწყვეტი იქნება — თუ სასურველი შედეგი ვერ დააფიქსირა, რედ ბულს დატოვებს. ლოუსონის ადგილზე კი იუკი ცუნოდა მოიაზრება, რომელიც რეისინგ ბულსში საკმაოდ კარგად გამოიყურება.
სატურნირო ცხრილი ორი რბოლის შემდეგ
ავსტრალიის და ჩინეთის გრან პრის დასრულების შემდეგ, სატურნირო ცხრილში საკმაოდ საინტერესო ვითარებაა. კონსტრუქტორთა დავას 78 ქულით მაკლარენი ლიდერობს, ხოლო მეორე ადგილს 57 ქულით მერსედესი იკავებს.
მრბოლელების საერთო ჩათვლაში კი სიტუაცია შედარებით დაძაბულია და ლიდერობისთვის ოთხი პილოტი იბრძვის. ორი გრან პრის შემდეგ, პირველ ადგილზე 44 ქულით ლანდო ნორისია, რომელიც მოქმედ ჩემპიონს, მაქს ვერსტაპენს მხოლოდ 8 ქულით უსწრებს. 35 ქულით მე-3 პოზიციაზე იმყოფება ჯორჯ რასელი, ხოლო ოსკარ პიასტრის 34 ქულა აქვს და მე-4 ადგილზეა.
მრბოლელების საერთო ჩათვლაში კი სიტუაცია შედარებით დაძაბულია და ლიდერობისთვის ოთხი პილოტი იბრძვის. ორი გრან პრის შემდეგ, პირველ ადგილზე 44 ქულით ლანდო ნორისია, რომელიც მოქმედ ჩემპიონს, მაქს ვერსტაპენს მხოლოდ 8 ქულით უსწრებს. 35 ქულით მე-3 პოზიციაზე იმყოფება ჯორჯ რასელი, ხოლო ოსკარ პიასტრის 34 ქულა აქვს და მე-4 ადგილზეა.
ფორმულა 1-ის 2025 წლის სეზონის საწყისი ორი ეტაპის დასრულების შემდეგ, 2 კვირიანი პაუზა იქნება და სამეფო რბოლები ამომავალი მზის ქვეყანაში დაბრუნდება. იაპონიის გრან პრი 4-6 აპრილს გაიმართება.
