როგორც მოგეხსენებათ, კონფერენს ლიგის შესარჩევი ეტაპის მეორე რაუნდის ფარგლებში თბილისის იბერია 1999 შინ ტირანას პარტიზანს მიიღებს. შეხვედრა გაიმართება 25 ივლისს, 20:00 საათზე. მატჩისწინა პრესკონფერენციაზე ქართული გუნდის მთავარმა მწვრთნელმა, ლევან კორღალიძემ მოახლოებული თამაშის შესახებ ისაუბრა.
"გუნდში დავბრუნდი ორი კვირის წინ და ამ დროის მანძილზე გავაკეთე ჩემი მაქსიმუმი, რაც შემეძლო. შემადგენლობას ვიცნობ კარგად, ფეხბურთელების 80%-თან ადრეც მიმუშავია. ისინი კი ვისაც არ ვიცნობდი, უკვე გავიცანი. ეს არის ჩემი დებიუტი ევროტურნირებზე მწვრთნელის რანგში, რაც არის დიდი გამოწვევა.
იქამდე, ორჯერ გავიყვანე ქართული გუნდი ევროტურნირზე, თუმცა სამწუხაროდ უშუალოდ ევროტურნირებამდე ვერ მივედი. იბერია არ წარმოადგენს მხოლოდ კლუბს, წარმოადგენს მთელ საქართველოს. რაც შეეხება მეტოქეს, პარტიზანი კარგად დაბალანსებული გუნდია, ახალგაზრდული შემადგენლობით.
ალბანეთის ჩემპიონია, რაც ბევრს ნიშნავს, თუმცა იდეალური გუნდი არ არსებობს. ყველა გუნდს აქვს თავისი სუსტი მხარეები მათ შორის პარტიზანსაც. ხვალინდელი მატჩისთვის იმედიანად ვარ განწყობილი", - განაცხადა ქართველმა მწვრთნელმა.
