ჩემპიონთა ლიგის საკვალიფიკაციო ეტაპის პირველ რაუნდში იბერია მალმიოს დაუპირისპირდება. საინტერესოა, რომ შვედური გუნდის შემადგენლობაში თამაშობს წარსულში ცნობილი ფეხბურთელის, ეიდურ გუდიონსენის შვილი, დანიელი. ახალგაზრდა ფორვარდმა მოიარა მადრიდის რეალისა და ბარსელონას აკადემიები, მაგრამ პროფესიონალური კარიერა 2023 წელს, "ლურჯებში" დაიწყო.
ისლანდიელმა თავდამსხმელმა სკონურ გუნდში მოასწრო 15 მატჩის ჩატარება და 4 გოლის გატანა, წინ, თბილისური კლუბის წინააღმდეგ გასამართი შეხვედრაა. როგორც გვახსოვს, ქართულ გუნდთან უთამაშია ელედა სთეიდიუმის ბინადრების ფორვარდის მამასაც, როდესაც ის ათენის აეკის ღირსებას იცავდა.
ეს მოხდა ევროპა ლიგის 2011/2012 წლების სეზონის საკვალიფიკაციო ეტაპის პლეიოფში, სადაც "არწივების" მოწინააღმდეგე თბილისის დინამო აღმოჩნდა. მანოლო ხიმენესის გუნდთან შეხვედრამდე, ქართულმა კლუბმა გადალახა ევროპა ლიგის შესარჩევის 3 ბარიერი: მილსამთან, ლანელსა და რეიკიავიკთან მოგებით.
"ლურჯ-თეთრებს" ევროპა ლიგაზე მოსახვედრად აშორებდათ ერთი ნაბიჯი და უნდა ითქვას, რომ მიზნის მიღწევასთან ისინი ახლოს იყვნენ. აია-სოფიაზე გამართული შეხვედრა დასრულდა მასპინძელთა მოგებით მინიმალური ანგარიშით, საპასუხო დაპირისპირებაში კი 1:0 ალექს გარსიას გუნდმაც იმარჯვა.
აეკს იმ მატჩში ალექსანდრე კოშკაძემ გაუტანა. დაინიშნა დამატებითი დრო, რომელშიც სტუმრებისთვის პენალტი სწორედ ისლანდიელმა ფორვარდმა გამოიმუშავა. ათენელებმა გაათანაბრეს ანგარიში და ევროპა ლიგის საგზურიც გაიფორმეს. როგორც ვხედავთ, 14 წლის შემდეგ, ქართულ კლუბს უკვე "ბლაუგრანას" ექს-ფორვარდის შვილი დაუპირისპირდება.
