კანოე-კაიაკის საერთაშორისო ტურნირზე ქართველმა სპორტსმენებმა 9 მედალი მოიპოვეს. კვიპროსში გამართულ შეჯიბრებაე ქართველებმა ექვსი ოქროსა და სამი ბრინჯაოს მედალი დაისაკუთრეს.
ერთადგილიანი კაიაკით სენიორებში 200-მეტრიან დისტანციაზე ჩემპიონობა იზეიმა ნიკა ოდიშელიძემ, ამავე დისტანციასა და კატეგორიაში ბრინჯაო ბადრი ყაველაშვილმა მოიპოვა. ასევე ბრინჯაოს პრიზიორი გახდა 500-მეტრიან დისტანციაზე ნიკა ოდიშელიძე.
ორადგილიანი კაიაკით სენიორებში 500-მეტრიან დისტანციაზე ბრინჯაოს პრიზიორები კვლავ ნიკა ოდიშელიძე და ბადრი ყაველაშვილი გახდნენ. ერთადგილიანი კანოეთი სენიორებში 200-მეტრიან დისტანციაზე ჩემპიონობა ალექსანდრე წივწივაძემ იზეიმა.
ერთადგილიანი კანოეთი ვაჟთა კატეგორიაში 200-მეტრიან დისტანციაზე ოქროს მედალი მოიპოვა საბა მალანიამ, მან ასევე ჩემპიონობა იზეიმა 500-მეტრიან დისტანციაზეც. ერთადგილიანი კანოეთი იუნიორთა კატეგორიაში 200-მეტრიან დისტანციაზე ჩემპიონობა იზეიმა მანანა პეტრიაშვილმა, ის ასევე 500-მეტრიან დისტანციაზეც ჩემპიონი გახდა.
ტურნირზე, რომელშიც 20 ქვეყნის 200-ზე მეტი სპორტსმენი მონაწილეობდა, საქართველოს ნაკრებმა გუნდურ ჩათვლაში მეოთხე ადგილი დაიკავა.
