ამერიკული ბრენდი სამეფო რბოლებში მოსახვედრად ბოლო წლები აქტიურად ემზადებოდა და მოლაპარაკებებს აწარმოებდა. კადილაკს უკვე აქვს მსოფლიოს მასშტაბით 4 ბაზა და ბოლიდზე 200-ზე მეტი ადამიანი მუშაობს.
ვინ იქნებიან ამერიკული გუნდის მრბოლელები? — ახლა მთავარი კითხვა სწორედ ეს არის. გავრცელებული ინფორმაციით, კადილაკში სურთ, რომ ბოლიდის სავარძელი ერთმა გამოცდილმა და ერთმა ახალგაზრდა პილოტმა მოირგოს. მთავარი კანდიდატები კი ვალტერი ბოტასი და კოლტონ ჰერტა არიან.BREAKING: Cadillac confirmed as 11th team on the 2026 F1 grid#F1 pic.twitter.com/V5eoWfQCYX
— Formula 1 (@F1) March 7, 2025
ბოტასი ფორმულა 1-ში 2010 წელს გამოჩნდა, როდესაც უილიამსის სარეზერვო პილოტი გახდა, ხოლო 3 წლის შემდეგ გუნდის მრბოლელის სტატუსი მოიპოვა. 2017-21 წლებში ის მერსედესის ღირსებას იცავდა და 10 რბოლის მოგებაც მოახერხა. 2022-24 წლები ალფა რომეო/ზაუბერში გაატარა, ხოლო 2025 წლის სეზონში მერსედესის სარეზერვო პილოტი იქნება.
35 წლის ფინელისგან განსხვავებით, კოლტონ ჰერტას სამეფო რბოლებში არასდროს მიუღია მონაწილეობა და ინდიქარის მრბოლელია. 24 წლის ამერიკელი ფორმულა 1-ში მოხვედრასთან ახლოს 2022 წელს იყო — მას ალფა რომეოში ბოტასის თანაგუნდელად განიხილავდნენ, თუმცა, მოლაპარაკებები ჩაიშალა და ადგილი გუან ჟოუმ დაიკავა. ინდიქარის გასული სეზონის სერიებზე, ჰერტამ 513 ქულა მოაგროვა და მეორე ადგილი დაიკავა.
კადილაკის ფორმულა 1-ში დებიუტამდე 1 წელია დარჩენილი და შესაძლოა ყველაფერი რადიკალურად შეიცვალოს, თუმცა, ამ ეტაპზე მთავარი ფავორიტები სწორედ ბოტასი და ჰერტა არიან. მანამდე კი სამეფო რბოლების მოყვარულებს 2025 წლის სეზონი ელით, რომელიც ბოლო იქნება ჰიბრიდულ და 10 გუნდიან ერაში.
