სეზონის წინ, რეალი კიდევ უფრო გაძლიერდა და მსოფლიოს ერთ-ერთი გამორჩეული ფეხბურთელი კილიან მბაპე დაიმატა. ამ ტრანსფერის შემდეგ, სუპერთასზე ვნახეთ, რომ რეალის ერთ-ერთმა ლიდერმა ჯუდ ბელინგემმა სათამაშო პოზიცია შეიცვალა და თუ წინა სეზონში ე.წ. ცრუ ფორვარდი იყო, ახლა შედარებით უკნიდან, 8 ნომრის პოზიციაზე თამაშობს.
ამ და სხვა თემებზე რეალის მთავარმა მწვრთნელმა კარლო ანჩელოტიმ ისაუბრა.
ყველა შესაძლო ტიტულის მოგებაზე
"ჩვენ ყველაფერს რეალურად ვუყურებთ. ვიცით, რომ წინ რთული გზაა გასავლელი, რთული მატჩები გველის და არავინ იცის, რა მოხდება მაისში. გუნდის მიზანია ყოველდღე იშრომოს, განვითარდეს და მოედანზე ყველა მატჩში მოსაგებად გავიდეს."
კროოსის დანაკლისზე
"კროოსი განსაკუთრებული ფეხბურთელია, რომლის შეცვლაც შეუძლებელია, თუმცა პირველ შეხვედრაში ყველაფერი კარგად წავიდა. ვმუშაობთ და ვხვეწთ ტაქტიკას, როგორ შეიძლება მის გარეშე თამაში."
განახორციელებს რეალი ამ ზაფხულს კიდევ ერთ ტრანსფერს?
"შემადგენლობა უკვე შერჩეულია. სატრანსფერო ფანჯარა კვლავ ღიაა, თუმცა გეგმა შედგენილია. ცენტრალური მცველი? ჩვენ გვყავს ალაბა, რომელიც ტრავმიდან მალე დაბრუნდება, ასევე ახალგაზრდა ფეხბურთელები, რომელთაც მაღალ დონეზე თამაში შეუძლიათ."
ბელინგემის პოზიციაზე
"პირველ მატჩში მისი ახალ პოზიციაზე თამაშით კმაყოფილი ვარ. ბელინგემის როლი უცვლელი იქნება - მას შედარებით უკან ჩამოსვლა დაევალება, რათა ბურთი გაანაწილოს, შეტევაში კი მისი როლი უცვლელია."
ანჩელოტი საინტერესო ინიციატივით
"წინ გრძელი და დამღლელი სეზონი გველის, ამიტომ ვფიქრობ, შუა სეზონში რამდენიმე მოთამაშეს ეტაპობრივად არდადეგებზე წასვლის და დასვენების საშუალება უნდა მივცე. განსაკუთრებით მათ, ვინც სანაკრებო ფორუმზე ითამაშეს. ვფიქრობ, ეს საუკეთესო გამოსავალი იქნება. მაგალითად, ვინისიუსი, რომელიც ლა ლიგის მატჩს ითამაშებს, 3-4 დღით სამშობლოში დაბრუნება შეეძლება, რათა განიტვირთოს."
ტიტულის დაცვაზე
"ყველა ვხედავთ, როგორ ვითარდება ესპანეთში ფეხბურთი. ეს მხოლოდ ლა ლიგას არ ეხება. სანაკრებო ასპარეზზე ყველაფერს ესპანელები იგებენ. ისინი წარმატებით გამოვიდნენ ევროპის ჩემპიოანტსა და ოლიმპიადაზე, ძლიერდებიან სხვა კლუბებიც - ატლეტიკო, ბარსელონა, ამიტომ ურთულესი სეზონი იქნება. პირველი ტურები ბევრ რამეს დაგვანახებს. ვფიქრობ, წელს საკმაოდ მხიარული და საინტერესო ჩემპიონატი გვექნება."
