დღეს, ოლიმპიურ სასახლეში, საქართველოს ფუტსალის ეროვნული ნაკრები ევროპის ჩემპიონატის საკვალიფიკაციო ეტაპის პლეი-ოფის პირველ მატჩს გამართავს.ჩვენი გუნდი სლოვაკეთის ნაკრებს უმასპინძლებს.
გუშინ ავთანდილ ასათიანმა გუნდი მატჩის მასპინძელ დარბაზში ავარჯიშა. საწვრთნელ პროცესში 16ფეხბურთელი მონაწილეობდა.
მომავალი მატჩისა და საქართველოს ნაკრების შესახებ, საქართველოს ფუტსალის ეროვნული ნაკრების მთავარმა მწვრთნელმა, ავთანდილ ასათიანმა და ფეხბურთელმა, გიორგი ღავთაძემ ისაუბრეს:
ავთანდილ ასათიანი :„ძალიან ბევრი მნიშვნელოვანი თამაში ჩაატარა ნაკრებმა და ამ მხრივ ბიჭები უკვე მომზადებულები არიან. ტაქტიკურად და თეორიულად ნაყოფიერი შეკრება გავიარეთ. ვფიქრობ, მზად ვართ თამაშისთვის, თუმცა საბოლოოდ ყველაფერი მოედანზე გადაწყდება. სწორედ ამისთვის იყო შესარჩევი ეტაპი – აქამდე რომ მოვსულიყავით. კარგია, რომ ვისწავლეთ ფინალამდე მისვლა და ვფიქრობ, სლოვაკეთთან ორ მატჩში ბევრი რამ გამოჩნდება. დიდ იმედს ვამყარებ ჩვენს გულშემატკივრებზე, რადგან მათ გარეშე ძალიან გაგვიჭირდება. მოვუწოდებ ყველას, რომ გვერდით დაგვიდგნენ და ერთად დავიმსახუროთ ევროპის ჩემპიონატზე გასვლა".
გიორგი ღავთაძე:„აქამდე მოსვლა მარტივი არ ყოფილა – რთული გზა და დაძაბული მატჩები გამოვიარეთ. მაგალითად, კოსოვოსთან შეხვედრები, რომლებმაც მოგვცა აქ თამაშის უფლება. ვფიქრობ, ჩვენ და სლოვაკეთს თანაბარი შანსები გვაქვს. მაგრამ ამ ორ თამაშში იმ გუნდს ექნება უპირატესობა, ვინც უფრო მეტად იბრძოლებს, სწორად ითამაშებს და რაც მთავარია – ნაკლებ შეცდომას დაუშვებს. სწორედ ის გავა ევროპის ჩემპიონატზე. სულ სხვა შეგრძნებაა, როდესაც სავსე დარბაზში თამაშობ. გულშემატკივრების მხარდაჭერას ველოდებით, რადგან ერთად უფრო ძლიერები ვიქნებით და აუცილებლად გავიმარჯვებთ".
საქართველო - სლოვაკეთისმატჩი დღეს, 20:00 საათზე დაიწყება. დასწრება თავისუფალია.
პლეი-ოფის საპასუხო შეხვედრა 23 სექტემბერს, ბრატისლავაში გაიმართება.
