დღეს გაიმართება კონფერენს ლიგის საკვალიფიკაციო რაუნდის პირველი ეტაპის შეხვედრები, სადაც ქუთაისის ტორპედო და გორის დილა ითამაშებენ.
ორივე გუნდმა პირველი შეხვედრები მოიგო, საქმე ბოლომდე აქვღ მისაყვანი და ახლოს არიან შემდეგ ეტაპზე გასვლასთან.
გორის დილამ სტუმრად ლუქსემბურგის რასინგს სძლია თან ისე, რომ პირველი გოლი გაუშვა, თუმცა გორელებმა ქამბექი შემოგვთავაზეს და მიზანი შინაც გამარჯვებაა.
დიეგო ლონგო (დილას მწვრთნელი):"პირველი მატჩი ლუქსემბურგში ძალიან კარგი იყო შედეგის მხრივ, რაც შეეხება უშუალოდ თამაშს მოწინააღმდეგეს კარგი ორგანიზება ჰქონდა, დახვეწილი სტილით, ორგანიზებულად თამაშობდნენ, იბრძოდნენ.ჩვენ გავუშვით რამდენიმე შანსი ხელიდან, მიუხედავად ამისა ჩვენთვის საბოლოო შედეგი პოზიტიური გამოდგა. თავიდან ლუქსემბურგელების გათვლა იყო რომ ეთამაშათ გრძელი პასებით, ამის შემდეგ ცოტა რთული იყო ბურთის საფარზე დაბრუნება, მაგრამ მეორე ნახევარში ეს შევძელით და თითქმის 70% ბურთის ვფლობდით.ნერვებისა და წნეხის გამო ცოტა რთული იყო თავიდანვე კარგი სტარტის აღება, რადგან პირველი მატჩი სტუმრად მოგვიხდა, მეტად ვნერვიულობდით, მაგრამ გასული მატჩით მივხვდი რომ მომდევნო შეხვედრაში უფრო მეტი ყურადღება და კონცენტრაცია გვმართებს რათა თამაშის ხარისხის კუთხით თავი უკეთესად წარმოვაჩინოთ."
რაც შეეხება ტორპედოს, მძიმე და დრამატული მატჩის შემდეგ, ქუთაისელებმა საკუთარ მოედანზე ორდაბასს 4:3 სძლიეს, თუმცა დასრულებული აქაც არაფერია და სტუმრად ასევე რთული მატჩი იქნება.
გუნდის მთავარი მწვრთნელი დირკ შუსტერი აცხადებს, რომ განმეორებით მატჩს გუნდი შედარებით შეცვლილი ტაქტიკით და შემადგენლობით ითამაშებს.
სავარაუდოდ, ამაში ის იგულისხმება, რომ წინა მატჩში ტორპედო ზედმეტად ფრთხილი, 5-მცველიანი ტაქტიკით გამოვიდა მოედანზე, მეორე ტაიმში შეცვლილი სქემის შემდეგ კი ტორპედოს თამაში უფრო სანახაობრივი გახდა.
დირკ შუსტერი (ტორპედოს მწვრთნელი):"ყაზახეთში რამდენიმე დღით ადრე ჩამოვედით, რადგან გვსურდა აკლიმატიზაცია უკეთ გაგვევლო. მსურს ვისარგებლო შემთხვევით და "ორდაბასს" მადლობა გადავუხადო, რომ გუშინ სავარჯიშო მოედანი დაგვითმეს.ამ მატჩისთვის ოპტიმისტურად ვარ განწყობილი. ის, რომ აქ ყველას ჩვენი დამარცხება სურს, არა თუ წნეხი, არამედ დამატებითი მოტივაციაა გუნდისთვის.ორდაბასის არაერთი მატჩი ვნახეთ. ჩვენს შემდეგ "ასტანასთან" ითამაშეს, ვნახეთ ის შეხვედრაც. ცხადია, რთული მეტოქეა, თუმცა ჩვენც შევუქმნით პრობლემებს.პირველ მატჩში ხასიათი, მენტალიტეტი გამოვავლინეთ. იგივეს ვგეგმავთ ხვალ. ცვლილებები შემადგენლობაში იქნება, თუმცა ამაზე დღეს საუბარს არ ვაპირებ."
როგორც ტორპედოს, ისე დილას დღევანდელი დაპირისპირება თბილისის დროით 20:00 საათზე გაიმართება.
