ასეთ დროს, ემოციების შეკავება მართლაც რთულია, რადგან კვარამ ცხოვრების საუკეთესო წლები ნეაპოლში გაატარა და მსოფლიო ფეხბურთის ვარსკვლავად იქცა.
"მოვედი როგორც პატარა ბიჭი და მივდივარ, როგორც კაცი", - ეს ის სიტვებია, რომელიც ზუსტად აღწერს კვარაცხელიას 2.5 წლიან მოღვაწეობას იტალიურ კლუბში.
კვარაცხელიამ მოიგო სკუდეტო, გახდა ჩემპიონთა ლიგის წლის საუკეთესო ახალგაზრდა ფეხბურთელი, ოქროს ბურთის ნომინანტების საუკეთესო 20-ეულში მოხვდა და სერია ა-ს და ჩემპიონთა ლიგის საუკეთესო დრიბლიორია. რაც მთავარია, ის ფანების კერპი გახდა - "კვარადონა", "კვარავაჯო" და ა.შ.
"ვიცი, ჩემი წასვლით გული გწყდებათ, მაგრამ ერთ დღეს, ყველაფერს მოგიყვებით", - რა აქვს ხვიჩას მოსაყოლი?
ყველაფერი 2023 წლის ზაფხულში დაიწყო, როცა კვარაცხელიას უკვე სერია ა-ს ჩემპიონის და მთავარი გმირის სტატუსი ჰქონდა. მიუხედავად იმისა, რომ ის გუნდის ლიდერი იყო, ხელფასი მაინც ყველაზე დაბალი ჰქონდა. ამის მიუხედავად, კვარაცხელიამ მეორე სეზონიც ნაპოლიში დაიწყო იმის იმედად, რომ რაიმე სიახლე იქნებოდა. ნაპოლიმ სეზონი ჩააგდო, ქართველ შემტევს მაინც კარგი სტატისტიკა ჰქონდა.
ფეხბურთელის აგენტი მამუკა ჯუღელი მოლაპარაკებების გასამართად და ახალი კონტრაქტის შესათანხმებლად იტალიაში არაერთხელ ჩავიდა, თუმცა ამაოდ. ნაპოლის პრეზიდენტს "პინოქიოს სინდრომი" ჰქონდა და ასეთ დროს, სიტუაციის დალაგება რთულია.
დე ლაურენტისი კვარას 4 მილიონ ევროზე მეტს არ სთავაზობდა, როცა იქით ოსიმენს ანაზღაურება 10 მილიონი ევრო ჰქონდა. რა თქმა უნდა, კვარასთვის ფულზე წინ კარიერა დგას, თუმცა როცა გუნდის მთავარი მამოძრავებელი ძალა ხარ და ყველაზე ნაკლები ანაზღაურება გაქვს, კითხვის ნიშნები ჩნდება.
ზემოთ ნახსენები "პინოქიო" იტალიაში ახლადჩასულ უცხო ბიჭს კონტრაქტს ისეთი დეტალებით უფორმებს, რაც იმ მომენტში მეორეხარისხოვანია, მაგრამ ამ ნიუანსებმა თავი თვეების შემდეგ იჩინა. მაგალითად, კონტრაქტის თანახმად, კვარას ყველა საიმიჯო უფლების 100%-იან წილს ნაპოლი იღებს. ანუ, თუ ხვიჩა რეკლამიდან ან სპონსორებიდან რაიმე ჰონორარს აიღებს, ეს თანხა ნაპოლის ეკუთვნის, მათ შორის ადიდასისაც, რომლის სახე კვარაცხელია ერთი წლის წინ გახდა. კონტრაქტის მსგავსი უცნაური პუნქტი მსოფლიო ფეხბურთში ალბათ არავის აქვს.
გამოდის, რომ მთელი ეს პერიოდი ნაპოლი კვარაცხელიას ფულს კი არ უხდიდა, პირიქით, აქეთ იღებდა კვარაცხელიასგან იმ თანხას, რომელიც მას ცალკეული სპონსორებისგან ჰქონდა, რაც კლუბის ხელმძღვანელობის კიდევ ერთ ტყუილზე მეტყველებს.
2024 წლის ზაფხულში, კვარაცხელიას ორი რეალური მსურველი უჩნდება - ბარსელონა და პსჟ. ბარსელონას არ აქვს ის ფინანსები, რასაც ხვიჩას სანაცვლოდ ნაპოლი ითხოვს, ამიტომ პსჟ უფრო აქტიურია და მზადაა, ქართველის სანაცვლოდ დიდი თანხა იმ წამსვე გადაიხადოს, თუმცა ამჯერად, დე ლაურენტისს მხსნელად კონტე ევლინება, რომელიც 23 წლის შემტევს არწმუნებს, რომ ფინანსურ თემებს მოუგვარებს და გუნდის აწყობა მის გარშემო სურს.
ხვიჩა ნაპოლიში კიდევ 6 თვით რჩება. ამ 6 თვეში ყოველდღიური საუბრები იყო ახალ ხელფასსა და პირობებზე, თუმცა ნაპოლის ხელმძღვანელობა კვლავ არ აპირებდა რაიმეს შეცვლას, კონტემაც ვერაფერი გააწყო და კვარაცხელია იძულებული გახდა, რომ გუნდი ამ ზამთარშივე დაეტოვებინა.
ამბობენ, კვარამ გუნდი შუა გზაში, შუა სეზონში მიატოვაო, მაგრამ არავინ იცის, რომ კონტემ და ხელმძღვანელობამ პირობა დაარღვია და არაფერი შეცვალა. მისი ხელფასი კვლავ 1.5 მილიონი იყო. თან, როგორც ზემოთ გითხარით, ამ თანხას ირიბად ისევ თავისი სპონსორებისგან იღებდა. ფაქტობრივად, კვარას ხელფასზე ნაპოლის ფინანსური გასავალი 0 ჰქონდა. პარალელურად, ასპარეზზე დავიდ ნერეში ჩნდება, რის შემდეგაც გუნდი ხვიჩას ისეთ მნიშვნელოვან ფიგურად აღარ აღიქვამს და წასვლის საქმეც ამიტომ გამარტივდა.
კარგია, რომ კვარაცხელიას პსჟ-ში ტრანსფერი იმაზე მარტივად მოხდა, ვიდრე ველოდით, რადგან სხვა ფეხბურთელებისთვის ნაპოლიდან თავის დაღწევა გაცილებით რთული პროცედურა გამოდგა, მაგალითად მარიო რუისთვის და ოსიმენისთვის. ასეთ დროს, ნაპოლის მოქმედი ხელშეკრულების უპირატესობა აქვს და შეუძლია ფეხბურთელი ან ცუდ გუნდში გაანათხოვროს, ან დიდ გუნდთან ერთად არც კი ავარჯიშოს, რაც საბედნიეროდ ქართველის შემთხვევაში არ მოხდა. არადა, ამის ალბათობაც იყო.
მოკლედ რომ ვთქვათ, ნაპოლიმ თავისი საინტერესო პოლიტიკით და ტყუილი დაპირებით ამ 2.5 წელიწადში მსოფლიოს ერთ-ერთ ყველაზე ნიჭიერი ფეხბურთელისგან მაქსიმუმი მიიღო, მინიმალური ხარჯებითა და ძალისხმევით.
ეს ის მცირე ისტორიაა, რაც კვარას ყველასთვის მოსაყოლი აქვს. დანარჩენს, თავად ხვიჩა განავრცობს...
