ტური სამტრედიაში დაიწყება, სადაც ადგილობრივი სამტრედია დინამო ბათუმს უმასპინძლებს. გუნდის მიზნები განსხვავებულია - იმერლების ამოცანა ბოლო ადგილიდან თავის დაღწევა და ეროვნულ ლიგაში დარჩენაა, დინამო ბათუმი კი ტრადიციულად ჩემპიონობისთვის იბრძვის.
ამ გუნდებს შორის გამართული პირველი მატჩი ბათუმელებმა შინ მოიგეს, თუმცა სამტრედიას ბოლო წუთებამდე მიჰყავდა თამაში და გოლები ბოლოს გაუშვა.
დინამო ბათუმს დისკვალიფიკაციის გამო სერბი მცველი ბოიან მლაჯოვიჩი დააკლდება, ამ გუნდის ლიდერი გიორგი წიტაიშვილი კი საქართველოს ნაკრების საწვრთნელ შეკრებას შეუერთდა.
მოულოდნელი მარცხის შემდეგ, იბერია საკუთარ მოედანზე შეცდომების გამოსწორებას სამგურალთან შეეცდება. ჩემპიონობისთვის მებრძოლმა იბერიამ გასულ ტურში გაგრასთან 4:0 წააგო. თუ წინა წლებში სამგურალი ევროტურნირებისთვის იბრძოდა, წელს მათი მთავარი მიზანი ეროვნულ ლიგაში დარჩენაა, ისინი ბოლოსწინა ადგილზე არიან.
რაც არ უნდა გასაკვირი იყოს, დინამო თბილისს გასავარდნ ზონამდე სულ რაღაც 2 ქულა აშორებს, ამიტომ მათთვის ყველა ქულა მნიშვნელოვანია. დღეს დინამოელები უშუალო კონკურენტ, გაგრას ეთამაშებიან და გამარჯვების შემთხვევაში, ცხრილში სამშვიდობოზე გავლენ. გაგრასაც და დინამოსაც 19-19 ქულა აქვთ.
ბრწყინვალე ფორმაშია ქუთაისის ტორპედო. მათ უკვე ზედიზედ 12 თამაშია არ წაუგიათ და ბოლო 4-დან ყველა თამაში მოგებული აქვთ. ამ სერიის გაგრძელებას ისინი თელავთან შეეცდებიან.
ტური დილასა და კოლხეთის მატჩით ხვალ დაიხურება. მძიმე სტარტის შემდეგ კოლხეთმა ბოლო პერიოდში ქულების აგროვება დაიწყო და ცხრილის შუა ნაწილშია, დილამ კი სეზონის პირველი ნახევარი პირველი ადგილით დაასრულა და ლიდერობის გამყარებას შეეცდება.
მატჩების განრიგი:
1 ივნისი, 16:30 - სამტრედია-დინამო ბათუმი
1 ივნისი, 19:30 - იბერია-სამგურალი
1 ივნისი, 20:30 - დინამო თბილისი-გაგრა
1 ივნისი, 21:30 - ტორპედო - თელავი
2 ივნისი, 20:00 - დილა-კოლხეთი
