მე-19 ტური დინამო თბილისისა და სამგურალის დაპირისპირებით გაიხსნა. რაც არ უნდა უცნაური იყოს, წელს ორივე გუნდის მთავარი მიზანი ეროვნულ ლიგაში ადგილის შენარჩუნებაა.
დინამოელებს რამდენიმე რეალური მომენტი ჰქონდათ, თუმცა სამგურალის მეკარე ნოდარ ყალიჩავა მოწოდების სიმაღლეზე იყო. შედეგად, შეცვლაზე შემოსულმა ლევან კუტალიამ სადებიუტო მატჩში დინამო თბილისს გაუტანა და ყოფილი გუნდის კარში გატანილი გოლი არ აღნიშნა. სამგურალმა 0:1 გაიმარჯვა.
ეროვნული ლიგის ლიდერმა გორის დილამ მოულოდნელი შედეგი დააფიქსირა და საკუთარ მოედანზე გაგრას ვერ მოუგო. გაგრელებმა თავი კარგად დაიცვეს და შეხვედრა უგოლოდ დაასრულეს.
სენსაციები დაფიქსირდა მეორე სათამაშო დღესაც. ჩემპიონობისთვის მებრძოლმა გუნდებმა იბერიამ და დინამო ბათუმმა შინ თელავსა და კოლხეთს ვერ მოუგეს. დინამო ბათუმი-კოლხეთის მატჩი უგოლოდ დასრულდა, იბერია კი თელავთან საბრძოლო შემადგენლობით გავიდა, აგებდა და ბოლო წუთებზე გაათანაბრა - 1:1.
ყველაზე საინტერესო მატჩი ქუთაისში შედგა. ტორპედო სამტრედიას დაუპირისპირდა. სამტრედიელებმა ანგარიში პირველ ტაიმში გახსნეს, რის შემდეგაც ტორპედო გააქტიურდა და 36-ე წუთზე გაათანაბრა.
ყველაფერი იქითკენ მიდიოდა, რომ კიდევ ერთი სენსაცია უნდა გვენახა, თუმცა 96-ე წუთზე, შეცვლაზე შემოსულმა ლაშა შერგელაშვილმა ბრწყინვალე ჯარიმით ტორპედოს მნიშვნელოვანი 3 ქულა მოუტანა. მატჩი 2:1 დასრულდა.
