რა დავინახეთ სადებიუტო მატჩიდან? - როგორც ჩანს, ლუის ენრიკემ ეს შეხვედრა ერთგვარ ტესტ-მატჩად გამოიყენა, რათა სწორად შეეფასებინა ქართველის შესაძლებლობები.
ამას ისიც მოწმობს, რომ ერთ მატჩში კვარაცხელიამ პოზიცია 4-ჯერ შეიცვალა. საწყისი წუთები ის თავის ჩვეულ მარცხენა ვინგერზე თამაშობდა, ტაიმის ბოლოს ცენტრში, ე.წ. 10-იანზე გადაინაცვლა.
ბარკოლას შემოსვლის შემდეგ, კვარაცხელია ჯერ თავდასხმაში, ცრუ ცხრიანად მოგვევლინა, ბოლოს კი მარჯვენა შემტევად.
დღევანდელი შეხვედრიდან შეიძლება ის დასკვნა გამოვიტანოთ, რომ მომავალში შეტევის წინა ხაზში კვარა-ბარკოლა-დემბელეს ტრიოს უნდა ველოდოთ, რომლებიც თამაშის პროცესში ხშირად გაცვლიან პოზიციებს. კვარას 4 პოზიციაზე მოსინჯვაც ამას ემსახურებოდა.
ნაპოლისგან განსხვავებით, პსჟ თავის ჩემპიონატში სხვებზე ბევრად ძლიერი და დომინანტი გუნდია, სულ ბურთს ფლობს და შესაბამისად, შეტევაში სივრცეები შედარებით ნაკლებია, რასაც ქართველმა ფეხბურთელმა ალღო უნდა აუღოს.
