ბათუმელები რაზგრადში 2 დღით ადრე ჩავიდნენ და საკმაოდ დამღლელი გზის შემდეგ, რაც რამდენიმე ქალაქის გადაკვეთას და ავტობუსით წასვლას მოიცავდა, ვარჯიში გამართეს.
დინამო ბათუმი ამ ზაფხულს ბევრმა ფეხბურთელმა დატოვა, არიან ახალწვეულებიც, რაზეც გუშინდელ ინტერვიუში ბათუმელთა თავკაცმა ანდრეი დემჩენკომ ისაუბრა:
"გუნდის 80% დაკომპლექტებულია. საკმაოდ მაღალი დონის ფეხბურთელები დავიმატეთ და ამით კმაყოფილი ვარ, თუმცა გაძლიერება გრძელდებ და კიდევ რამდენიმე მოთამაშეს დავიმატებთ. ლუდოგორეცი ყველაზე ძლიერი მეტოქეა, ვინც კი შეიძლებოდა შეგვხვედროდა. ისინი ყოველ წელს ქვეყნის ჩემპიონები არიან და ევროტურნირების ჯგუფში თამაშობენ"
მიმდინარე სეზონში დინამო ბათუმი ეროვნულ ლიგაში არასტაბილურად გამოიყურება, მე-4 ადგილს იკავებს და ვერც საქართველოს სუპერთასზე მიაღწია წარმატებას.
ჩვენი ინფორმაციით, არ არის გამორიცხული, ევროასპარეზზე წარუმატებელი ასპარეზობის შემთხვევაში, დემჩენკო მთავარი მწვრთნელის პოსტიდან გაათავისუფლონ.
რაც შეეხება მეტოქეს, ლუდოგორეცს გამოცდილი და მაღალი დონის ფეხბურთელები ჰყავს, რომელთა მიზანი ჩემპიონთა ლიგის ჯგუფში შესვლაა. მეტოქე მართლაც ძლიერია.
დინამო ბათუმისა და ლუდოგორეცის დაპირისპირება დღეს ბულგარეთის ქალაქ რაზგრადში, ჩვენი დროით 22:00 საათზე გაიმართება.
