"ჩამქრალი შესაძლებლობები" - ასე შეიძლება დავარქვათ იმ ყველაფერს, რასაც მოედანზე ვხედავდით. კვარას გამორჩეული თვისება, რითიც ის მსოფლიოში ერთ-ერთი საუკეთესოა, მარცხენა ფლანგზე თამაში, შუაში ბურთის შეტანა და იქიდან იმპროვიზაციაა. როცა კვარა ფლანგზე ბურთს იღებს, იმდენად არაპრგნოზირებადი და სახიფათო ხდება, რომ მცველებს მისი შეჩერება უჭირთ.
წინა შეხვედრებში კვარა ჯერ მარჯვნიდან უტევდა მეტოქეს, შემდეგ თავდამსხმელის პოზიციიდან. ნათლად გამოჩნდა, რომ ამ დროს ხვიჩა შებოჭილია და თავის შესაძლებლობებს ვერ იყენებს.
პსჟ-ს მაისურით ერთადერთი გოლი კვარაცხელიამ სწორედ თავდამსხმელის პოზიციიდან გაიტანა. მსგავსი ერთეული შემთხვევები კიდევ იქნება, მაგრამ საერთო ფონი ასეთია - მისთვის უჩვეულო პოზიციაზე თამაშისას, კვარას ეფექტურობა საგრძნობლად იკლებს.
მაგალითად, დღევანდელ მატჩში ერთ-ერთ ეპიზოდში კვარამ მარჯვნიდან გაამწვავა, მცველი მოატყუა და ცაციათი დარტყმა მოუწია, რაც მეკარისთვის უმარტივესი ნადავლი იყო. შუაში თამაშისას კი კვარაცხელია ბურთს ძირითადად ზურგით იღებს და თანაგუნდელს ბურთს მარტივად უგდებს ხოლმე.
რა არის გამოსავალი? - იქ, სადაც კვარა თავს ყველაზე კომფორტულად გრძნობს, ბარკოლა დგას, რომელიც ასევე ბრწყინვალე ფორმაშია და გუნდის ერთ-ერთი ლიდერია.
ენრიკეს საფიქრალი ჯერ არ დასრულებულა და ესპანელი სპეციალისტი ცდილობს, რომ იდეალურ 11-ეულს მიაგნოს, სადაც ყველა თავისი შესაძლებლობების მაქსიმუმს გამოავლენს.
