1996 წლის ატლანტის ოლიმპიურ თამაშებზე საქართველოს დელეგაცია 34 სპორტსმენით იყო წარმოდგენილი — 27 კაცი და 7 ქალი. გახსნით ცერემონიაზე მედროშედ მოკრივე გიორგი კანდელაკი აირჩიეს, რომელიც მედლის ერთ-ერთი მთავარი კანდიდატი იყო.
საქართველოს ნაკრებისთვის ზაფხულის XXVI ოლიმპიური თამაშები მძიმედ დაიწყო — აწონვაზე დაგვიანების გამო, შეჯიბრიდან მოქმედი ჩემპიონი და ერთ-ერთი მთავარი ფავორიტი, დავით ხახალეიშვილი მოხსნეს. ატლანტაში საქართველოს ნაკრებიდან მედლის მოპოვება კი მხოლოდ ორმა სპორტსმენმა მოახერხა — მესამე ადგილზე ძიუდოისტი სოსო ლიპარტელიანი და თავისუფალი სტილით მოჭიდავე ელდარ კურტანიძე გავიდნენ.
სოსო ლიპარტელიანი -78 კგ. წონით კატეგორიაში ასპარეზობდა და პირველ ორთაბრძოლაში კანადელი მორგანი დაამარცხა, თუმცა, შემდეგ კორეელ ჩოსთან დამარცხდა და ოქროსთვის ბრძოლას გამოეთიშა. რეპეშაჟში ქართველმა ძიუდოისტმა ერთმანეთის მიყოლებით მოლდოველ, უზბეკ, ბრაზილიელ და გერმანელ სპორტსმენებს აჯობა და კარიერაში პირველად დაეუფლა ოლიმპიადის ბრინჯაოს.
თავისუფალი სტილით ჭიდაობის -90 კგ. წონით კატეგორიაში ფავორიტებში მოიაზრებოდა ელდარ კურტანიძე, რომელმაც პირველი ორთაბრძოლა დამაჯერებლად, 11:0 მოიგო, თუმცა, შემდეგ მოულოდნელად, კორეელ კიმთან 2:3 დამარცხდა. რეპეშაჟში ქართველმა მოჭიდავემ ყველა ოპონენტი დაამარცხა და ატლანტის ოლიმპიადაზე ბრინჯაოს მედლის მფლობელი გახდა.
ამრიგად, საქართველოს ნაკრებმა პირველ ოლიმპიადაზე ასპარეზობა 2 ბრინჯაოთი და საერთო ჩათვლაში 68-ე ადგილით დაასრულა. აღნიშნული შედეგი საქართველოს ოლიმპიური კომიტეტის მიერ უარყოფითად შეფასდა და მზადება უკვე მომდევნო, 2000 წლის სიდენის ოლიმპიური თამაშებისთვის დაიწყო.
