2026 წლის მსოფლიო ჩემპიონატის დაწყებამდე სულ რაღაც ერთი კვირა რჩება, ეროვნული ნაკრებები კი მოსამზადებელი ეტაპის ბოლო ფაზაში იმყოფებიან. დღეიდან LaGazzetta.ge ახალ რუბრიკას შემოგთავაზებთ, რომლის ფარგლებშიც მსოფლიო ჩემპიონატის ფავორიტი და წამყვანი ნაკრებების სავარაუდო სასტარტო შემადგენლობებს გაგაცნობთ.
პირველ სტატიაში ბრაზილიის ნაკრების სავარაუდო სასტარტო XI ფეხბურთელზე ვისაუბრებთ. როგორც ჩვენთვის ცნობილია, კარლო ანჩელოტი 4-2-3-1 სათამაშო სქემის გამოყენებას გეგმავს და, არსებული ინფორმაციით, სასტარტო შემადგენლობაზეც თითქმის საბოლოოდ არის ჩამოყალიბებული.
ბრაზილია (4-2-3-1): ალისონ ბეკერი, უესლი ფრენსა, მარკინიოსი, გაბრიელ მაგალიაესი, ალექს სანდრო, ბრუნო გიმარაესი, კაზემირო, ლუის ენრიკე/რაიანი, რაფინია, ვინისიუს ჟუნიორი, მატეუს კუნია.
როგორც ხედავთ, ამ ეტაპზე მხოლოდ ერთი პოზიციაა, სადაც ორ ფეხბურთელს შორის კონკურენცია გრძელდება — დანარჩენ შემთხვევებში ანჩელოტისა და მისი სამწვრთნელო შტაბის გადაწყვეტილება პრაქტიკულად მიღებულია.
ბრაზილიური მედიის ცნობით, მსოფლიო ჩემპიონატზე მნიშვნელოვან სათამაშო დროს მიიღებს ენდრიკიც. ანჩელოტი ახალგაზრდა ფეხბურთელს როგორც ცენტრალური თავდამსხმელის, ისე ფლანგის შემტევის პოზიციაზეც განიხილავს. რაც შეეხება ნეიმარს, თუ გამოცდილი ფეხბურთელი სათამაშო კონდიციებს მალე აღიდგენს, 34 წლის ფეხბურთელი მოედანზე საკმაოდ დიდ დროს მიიღებს.
