ელ კლასიკოში მარცხის შემდეგ, ცნობილმა ინსაიდერმა, ხერარდ რომერომ, გაავრცელა მოულოდნელი ინფორმაცია - "ჩავი შესაძლოა დარჩეს! ყველაფერი დამოკიდებულია იმაზე, თუ რამდენად შეძლებს ბარსელონა ზაფხულში შემადგენლობის გაძლიერებას". ბევრს გაეღიმა, მაგრამ მალევე ამ ინფორმაციის დადასტურება სხვებმაც დაიწყეს.
ბოლოს კი საქმეში ფაბრიციო რომანოც ჩაერთო, რომელმაც ესპანელი მწვრთნელის კატალონიაში დარჩენა ასევე დაადასტურა - "შედგა შეხვედრა, რომელზეც ლაპორტამ ხავის დარჩენა სთხოვა. ის დათანხმდა და მომავალი სეზონისთვის ფიქრს შეუდგა".
ეს გადაწყვეტილება უცნაურია იმის გათვალისწინებით, თუ როგორი კატეგორიული იყო ესპანელი დამრიგებელი წასვლის საკითხში.
იანვრის განცხადების შემდეგ, "ბლაუგრანაში" რაღაც შეიცვალა - 13 შეხვედრა მარცხის გარეშე და ერთი ნაბიჯი ჩემპიონთა ლიგის ნახევარფინალამდე. "ლურჯ-ბროწეულისფრების" გამოცოცხლების შემდეგ, კლუბის ვიცე პრეზიდენტმა, რაფა იუსტემ, გადაწყვიტა ერნანდესის დარჩენაზე დაყოლიება, მაგრამ მას ეს არ გამოუვიდა.
ამის მიუხედავად, ისეთი საიმედო ინსაიდერები, როგორებიც არიან ფერან მარტინესი და როჯერ ტორელო ამტკიცებდნენ, რომ კამპ ნოუს ბინადართა დამრიგებელმა შესაძლოა გადაიფიქროს, რადგან ის ხედავს, რომ მისი პროექტი ვითარდება. რჩებოდა ერთი დეტალი: რამდენად დაუჭერდა ბარსას ხელმძღვანელობა 44 წლის სპეციალისტის გეგმებს მხარს.
ჩავი შემადგენლობის გაძლიერებას ითხოვს და პრესაში ვრცელდება კონკრეტული სახელებიც - ბერნარდო სილვა და დანი ოლმო. მათ გარდა, სატრანსფერო სიაში ახალი ჩამშლელიც ფიგურირებს. არსებობს ერთი პრობლემა: კატალონიელებს არ აქვთ ვარსკვლავების მოსაზიდი ფული, რადგან კლუბი ფინანსურ პრობლემებს ჯერ კიდევ განიცდის.
ლაპორტა ცდილობს მთელი ძალებით ამ პრობლემის აღმოფხვრას და უნდა ითქვას, რომ გარკვეული წინსვლა მართლაც შეინიშნება. "ბლაუგრანამ" უნდა მიიღოს 40 მილიონი საინვესტიციო ფონდ Libero-სგან, Barca Studios-ს აქციების გაყიდვის შემდეგ. ამასთან ერთად, "ლურჯ-ბროწეულისფრებმა" შეძლეს Nike-თან შეთანხმების მიღწევაც.
ახალი კონტრაქტის თანახმად, კამპ ნოუს ბინადრები ამერიკული კომპანიისგან ყოველწლიურად 100 მილიონ ევროს მიიღბენ, 10 წლის განმავლობაში. ცხადია, ფინანსური მდგომარეობის გასაუმჯობესებლად გარდაუვალი იქნება მოთამაშეების გაყიდვაც. ბარსას განკარგულებაში ისეთი შემსრულებლები არიან, რომლებიც სატრანსფერო ბაზარზე ძვირად ფასობენ.
ფრენკი დე იონგი, რონალდ არაუხო, რაფინია დიასი, ანსუმანე ფატი - კატალონიელებს რომელიმე მათგანთან განშორება მოუწევთ. ამის გარდა, არაა გამორიცხული ვეტერანების არაბეთში სარფიანად გასხვისებაც. საუბარია რობერტ ლევანდოვსკისა და ილქაი გუნდოგანის შესახებ. ერთი შეხედვით, ეს ყველაფერი არარეალურია, მაგრამ ფაქტია, ესპანელი დამრიგებელი დარჩა და გარანტიების გარეშე ის თავის გადაწყვეტილებას არ შეცვლიდა.
