ქართველი ძალოსნები პერუში მიმდინარე 17 და 20 წლამდე ძალოსანთა მსოფლიოს ჩემპიონატზე წარმატებულ ასპარეზობას აგრძელებენ.
17 წლამდელთა შორის 102 კილოგრამ კატეგორიაში კვარცხლბეკზე ორი ქართველი ავიდა.
ჯაბა ტყეშელაშვილმა (102 კგ.) ჩემპიონობა იზეიმა. ქართველმა ატაცში ვერცხლის, აკვრასა და ორჭიდში კი ოქროს მედლები მოიპოვა. ჯაბამ ატაცში 142 / 145 კგ. დაძლია, აკვრაში 181 / 186 / 192 კილოგრამი დააფიქსირა, ორჭიდში კი 337 კილოგრამი დააგროვა. ამასთან ტყეშელაშვილმა საქართველოს რეკორდის დამყარებაც შეძლო, რომელიც მასვე ეკუთვნოდა. ძალოსანმა აკვრასა და ორჭიდში ქვეყნის რეკორდი 10 -10 კილოგრამით გააუმჯობესა.
ამავე ასაკსა და წონაში საბა ჩხილაძემ ბრინჯაოს სამი მედალი მოიპოვა. ძალოსანმა მთავარი მწვრთნელის, ზურაბ ანთაურის ხელმძღვანელობით, ატაცში 123 / 125 / 130კგ. დაძლია, აკვრაში 154 / 159 / 162 დააგროვა, ორჭიდში კი 292 კილოგრამით დააფიქსირა.
პერუში მიმდინარე შეჯიბრზე ნანა ხორავამ (U20, 76 კგ.)ატაცში ბრინჯაოს მედალი მოიპოვა. ძალოსანმა მთავარი მწვრთნელის, თემურ ჯანჯღავას ხელმძღვანელობით, ატაცში 97 / 101 / 103 კილოგრამი დაძლია, ბრინჯაოს მედალი მოიპოვა და მსოფლიო პრიზიორი გახდა. ნანამ საქართველოს რეკორდიც დაამყარა, რომელიც მასვე ეკუთვნოდა 12 კილოგრამით გააუმჯობესა.
მსოფლიოს ჩემპიონობა იზეიმა გოგა ჯაჯვანმა (U20, 89 კგ.). ქართველმა ატაცში ბრინჯაო, კვრასა და ორჭიდში კი ოქროს მედლები მოიპოვა. გოგამ ატაცში 156 / 162 კგ, აკვრაში 90 / 195 / 198 კილოგრამი დაძლია, ორჭიდში კი 360 კგ. დააგროვა.
საქართველოს 17 წლამდელთა ნაკრებს პირველი მედალი დიმიტრი აბრალავამ (67 კგ.) მოუტანა, ქართველმა აკვრაში ვერცხლის მედალი მოიპოვა და ვიცე-ჩემპიონობა იზეიმა. 20 წლამდელთა შორის კი გიგა ოდიკაძემ ატაცსა და ორჭიდში ბრინჯაოს მედლები მოიპოვა.
დღეს, პერუში, 20 წლამდე ძალოსანთა მსოფლიო ჩემპიონატზე საქართველოს ნაკრებიდან ორი ძალოსანი იასპარეზებს. მსოფლიო ფიცარნაგზე 18:30 საათზე, მარიამ მურღვლიანი (U20) გავა, ტურნირის საფინალო სესიაზე კი +109 კგ. წონით კატეგორიაში ირაკლი ვეკუა (U20) იასპარეზებს. შეჯიბრება 21:00 საათზე დაიწყება.
