ფორმულა 1-ის 2024 წლის სეზონის მე-18 გრან პრი მაკლარენის ბრიტანელმა პილოტმა, ლანდო ნორისმა მოიგო და მაქს ვერსტაპენთან ჩამორჩენა კიდევ უფრო შეამცირა.
18 რბოლის შემდეგ, 24 წლის ბრიტანელის ანგარიშზე 279 ქულაა, ხოლო მოქმედი ჩემპიონი მას მხოლოდ 52 ქულით უსწრებს — წინ კიდევ 6 გრან პრი და 3 სპრინტი გველოდება.
სინგაპურის გრან პრის შემდეგ, ფორმულა 1-ში შესვენებაა და რბოლები 4 კვირაში, აშშ-ის გრან პრით განახლდება. აღნიშნულ პერიოდში კი გუნდები ბოლიდის გაუმჯობესებასა და ჩამორჩენის აღმოფხვრას შეეცდებიან.
განსაკუთრებით ბევრი სამუშაო აქვთ მოქმედ ჩემპიონებს — ავსტრიულმა გუნდმა ბოლო რბოლა 30 ივნისს მოიგო და პირველობა მაკლარენს გადაულოცა. სეზონის სტარტზე, რედ ბული შესანიშნავ ფორმაში იყო და მაქს ვერსტაპენს ზედიზედ 7 პოულ პოზიცია ჰქონდა მოპოვებული, თუმცა, განახლებების შემდეგ ტემპი დაიკარგა, ბოლო 11 გრან პრიზე ნიდერლანდელმა მხოლოდ 1 პოული აიღო და 2 რბოლა მოიგო.
სტარტზე მოპოვებული ქულების წყალობით, მაქს ვერსტაპენი ამ ეტაპზე ლიდერობას ინარჩუნებს და ნორისთან 52 ქულიანი უპირატესობა აქვს. რედ ბულმა კი პირველობა მაკლარენს დაუთმო და უკვე 41 ქულით ჩამორჩება, ხოლო მესამეადგილოსან ფერარის 34 ქულით უსწრებს.
ფორმულა 1-ის 2024 წლის სეზონის დარჩენილი რბოლები:
1) აშშ-ის გრან პრი — 20 ოქტომბერი (სპრინტი);
2) მეხიკოს გრან პრი — 27 ოქტომბერი;
3) სან-პაულუს გრან პრი — 3 ნოემბერი (სპრინტი);
4) ლას ვეგასის გრან პრი — 23 ნოემბერი;
5) კატარის გრან პრი — 1 დეკემბერი;
6) აბუ დაბის გრან პრი — 8 დეკემბერი;
6 რბოლა და 52 ქულა — ჩემპიონობისთვის ბრძოლა გადამწყვეტ ფაზაში შედის
