დასრულდა 2024 წლის მსოფლიო ჩემპიონატი ძალოსნობაში, რომელსაც ბაჰრეინის დედაქალაქმა მანამამ უმასპინძლა.
საქართველოს ნაკრებიდან მედლების მოპოვება მხოლოდ რევაზ დავითაძემ შეძლო — 96 კგ წონითი კატეგორიის ატაცში ის ოქროს მედალს დაეუფლა, ხოლო ორჭიდის ჯამში ვიცე-ჩემპიონი გახდა.
ტრადიციულად განსაკუთრებული ყურადღება მძიმე წონას დაეთმო, სადაც ბოლო 9 წლის განმავლობაში ლაშა ტალახაძე დომინირებდა და ჩემპიონი ხდებოდა. პარიზის ოლიმპიადის შემდეგ, ქართველმა ძალოსანმა კარიერა დაასრულა და წლევანდელი ტურნირი სწორედ მის გარეშე ჩატარდა.
ლაშა ტალახაძის არყოფნაში მსოფლიო ჩემპიონატი ვარაზდატ ლალაიანის ტრიუმფით დასრულდა — 25 წლის სომეხი ძალოსანი ატაცში და ორჭიდში ოქროს მედალს დაეუფლა, ხოლო აკვრაში ბრინჯაოს დასჯერდა. ლალაიანმა 215 კგ აიტაცა, 252 კგ აკრა და ორჭიდის ჯამში 467 კგ მოაგროვა. აკვრაში ოქროს მედალი 21 წლის ირანელმა ალირეზა იუსეფმა მოიგო, რომელმაც 262 კგ დაძლია და რეკორდამდე 5 კგ დააკლდა.
ჯერჯერობით მიუწვდომელი დარჩა ლაშა ტალახაძის მიერ ტაშკენტში, 2021 წლის მსოფლიო ჩემპიონატზე დამყარებული რეკორდები სამივე მოძრაობაში: ატაცი — 225 კგ, აკვრა — 267 კგ, ორჭიდი — 492 კგ.
2015 წლის შემდეგ პირველად — ძალოსნობის მძიმე წონას ახალი მსოფლიო ჩემპიონი ჰყავს
