2024 წლის პარიზის ოლიმპიური თამაშების მე-12 დღეს, საქართველოს ღირსებას 3 სპორტსმენი დაიცავს — ძალოსანი შოთა მიშველიძე და ბერძნულ-რომაული სტილით მოჭიდავეები რამაზ ზოიძე და ლაშა გობაძე.
ბერძნულ-რომაული სტილით ჭიდაობის 67 კგ. წონით კატეგორიაში, ხალიჩაზე რამაზ ზოიძე გამოვა, რომელიც 1/8 ფინალში ყირგიზ ამანტურ ისმაილოვს დაუპირისპირდება, ხოლო წარმატების შემთხვევაში, შემდეგ ეტაპზე უკრაინელ ნასიბოვსა და სერბ ნემესს შორის გამარჯვებულს შეხვდება.
რამაზ ზოიძე ევროპის 23 წლამდელთა ჩემპიონატის 3-გზის გამარჯვებულია — მან აღნიშნული ტურნირი ზედიზედ 2017, 2018 და 2019 წლებში მოიგო. 2021 წელს კი ოსლოში გამართულ მსოფლიო ჩემპიონატზე მან ბრინჯაოს მედალი მოიპოვა.
დღეს, ასევე ხალიჩაზე ვიხილავთ მსოფლიო ჩემპიონს, ლაშა გობაძეს, რომელიც ბერძნულ-რომაული სტილით ჭიდაობის 87 კგ. წონით კატეგორიაში ასპარეზობს და პირველ ეტაპზე, 1/8 ფინალში ალჟირელ ბაშირ სიდ აზარას დაუპირისპირდება, 1/4 ფინალში კი მისი სავარაუდო მეტოქე ბულგარელ ნოვიკოვსა და დანიელ ბისულტანოვს შორის უძლიერესი იქნება.
30 წლის ქართველი მოჭიდავე მსოფლიოს ჩემპიონია, მან "პლანეტის საუკეთესოს" ტიტული 2019 წელს მოიპოვა. ოქროს გარდა, მას მსოფლიო ჩემპიონატებზე 2 ბრინჯაოს მედალიც აქვს მოგებული. 2019 წელს, ლაშა გობაძე ევროპის ვიცეჩემპიონი გახდა, ხოლო 2023 წელს ბრინჯაოს მედალს დაეუფლა.
დღეს საქმეში ჩაერთვება საქართველოს ძალოსანთა ნაკრები და პირველი ქართველი სპორტსმენი, რომელიც ფიცარნაგზე გამოვა შოთა მიშველიძეა — ის 61 კგ. წონით კატეგორიაში იასპარეზებს. სამწუხაროდ, 29 წლის ქართველ ძალოსანს ტრავმა აწუხებს და სრული დატვირთვით გამოსვლას ვერ შეძლებს.
შოთა მიშველიძე კარიერის განმავლობაში ევროპის ჩემპიონი ორჯერ გახდა — 2018 და 2023 წლებში. მას ასევე, ორჯერ აქვს მოპოვებული ევროპის ვიცეჩემპიონის სტატუსი, ხოლო ერთჯერ ბრინჯაოს დაეუფლა. მსოფლიო ჩემპიონატებზე კი შოთა მიშველიძის ანგარიშზე თითო ვერცხლი და ბრინჯაოა.
ბერძნულ-რომაული სტილით ჭიდაობის წინასწარი ორთაბრძოლები 13 საათსა და 30 წუთზე დაიწყება, ხოლო ძალოსნობის შეჯიბრი სტარტს 17:00 საათზე აიღებს.
პარიზი 2024, XII დღე — საქართველოს სახელით სამი სპორტსმენი იასპარეზებს
