ოფიციალურად: ლიონელ მესიმ სანაკრებო კარიერა დაასრულა! ამის შესახებ 39 წლის ფეხბურთელმა სოციალურ ქსელში განცხადება გაავრცელა.
"ფინალიდან გასული დროის შემდეგ, ამ ყველაფერზე ბევრი ფიქრისა და გაანალიზების შემდეგ, მინდა ყველას გაცნობოთ, რომ ნაკრებს ვტოვებ… ეს გადაწყვეტილება ძალიან მტკივნეული იყო და ახლაც გულით მტკივა, მაგრამ ვხვდები, რომ ამის დრო მოვიდა. გეფიცებით, ყოველთვის ყველაფერი გავიღე — არა მხოლოდ იმ ბოლო წლების განმავლობაში, როცა ყველაფრის მოგება შევძელით, არამედ მანამდეც. ყოველთვის ვიბრძოდი და ბოლომდე ვიხარჯებოდი ამ მაისურისთვის, იმისთვის, რომ თქვენთვის სიხარული მომენიჭებინა და ფეხბურთის საშუალებით არგენტინელობის სიამაყე მეგრძნობინებინა.
ცოტა დრო რჩება და ეტაპებიც ნელ-ნელა იხურება. ეს კი ერთ-ერთი მათგანია, რომელიც ძალიან მტკივა. მიყვარს, მიყვარდა და ყოველთვის მეყვარება ნაკრებში ყოფნა. ბოლომდე დავიხარჯე და ახლა აღარაფერი დამრჩა გასაცემი. თანაც, უკან ძალიან კარგი ახალგაზრდა ფეხბურთელები მოდიან, რომლებიც ნაკრებში ყოფნას იმსახურებენ. მადლობა იმ სიყვარულისთვის, რომელსაც 20 წლის განმავლობაში მჩუქნიდით. ძალიან მომენატრება თქვენი მოსმენა მოედნიდან. ახლა უკვე ერთ-ერთი თქვენგანი ვიქნები — გარედან მუდამ თქვენი გულშემატკივარი და მხარდამჭერი, კარგშიც და ცუდშიც, განსაკუთრებით ცუდში.
მადლობა ჩემს ოჯახს, რომ ყოველთვის ჩემ გვერდით იყო და ამ საოცარ, თუმცა რთულ მოგზაურობაში თან მახლდა. მადლობა თითოეულ მწვრთნელს, თანაგუნდელსა და ხელმძღვანელს, რომელთან ერთადაც მუშაობა მომიწია. თან მიმაქვს უამრავი დაუვიწყარი მოგონება და განსაკუთრებული მომენტი. მივდივარ სიმშვიდითა და სიამაყით, რადგან ჩემს თანაგუნდელებთან ერთად შევძელი თქვენთვის იმ ოცნებებზე ლამაზი მომენტების ჩუქება, რომლებიც ერთად განვიცადეთ. თქვენთან ერთად ამის ცხოვრება უბრალოდ სიგიჟე იყო. მიყვარხართ!
მადლობა ღმერთს, რომ არგენტინელად გამაჩინა. ვივა არგენტინა!
*ეს სიტყვები 21 ივლისს, ფინალიდან ორი დღის შემდეგ დავწერე. დღეს, მამაჩემის ამბის შემდეგ, ამ გადაწყვეტილებაში იმაზე მეტად ვარ დარწმუნებული, ვიდრე ოდესმე."
ლიონელ მესის ეროვნულ ნაკრებში დებიუტი 2005 წელს შედგა. მას შემდეგ არგენტინელმა 207 მატჩის ჩატარება მოასწრო, გაიტანა 125 გოლი და 68 საგოლე გადაცემითაც გამოიჩინა თავი.
